ახალქალაქსა და ბორჯომში ტექდათვალიერების ცენტრები გაიხსნება

აკრედიტაციის ეროვნული ცენტრის გენერალური დირექტორის მოადგილე მალხაზ ხარებავა ამბობს, რომ სამცხე–ჯავახეთში რამდენიმე კვირაში ახალი ტექინსპექტირების ცენტრები დაიწყებს ფუნცქიონირებას: „ბორჯომში, სავარაუდოდ, ცენტრი მომავალ კვირას გაიხსნება, ახალქალაქში კი, დაახლოებით, ორ კვირაში“.

ხარებავა ამბობს, რომ ტექინსპექტირების ცენტრების დამატების საჭიროების შესახებ ზაფხულში იცოდნენ, თუმცა ცენტრების მშენებელმა კომპანიამ ობიექტების გამართვა ვერ უზრუნველყო: „სტატისტიკურად დავთვალეთ, რომ სამცხე–ჯავახეთში რამდენიმე ცენტრის დამატება გვჭირდებოდა და ორის მშენებლობაზე ტენდერი ჯერ კიდევ ზაფხულში გამოვაცხადეთ, მაგრამ „გრინვეიმ“ გარკვეული ვალდებულებები თავის დროზე ვერ შეასრულა“.

კომპანია „გრინვეი საქართველოში“ ახალქალაქის ტექინსპექტირების ცენტრის გახსნის თარიღს ვერ აკონკრეტებს: „ბორჯომში აშენებულია და მალე ავტომობილებსაც მიიღებს, ახალქალაქში კი მშენებლობა დაწყებულია, თუმცა მეტეოროლოგიური პირობების გამო დასრულებული არ არის, ამიტომ ზუსტად ვერ გეტყვით, თუ როდის ამოქმედდება“.

„გრინვეი საქართველოს“ ტექნიკური დირექტორის ლევან აბრამიშვილის თქმით, ახალციხეში ინსპექტირების მობილური ხაზი ამოქმედდება: „ამჟამად ვეძებთ გაშლილ სივრცეს მობილური ხაზის განსათავსებლად, სადაც მოწყობილობა დაიდგმება და ყველა კატეგორიის ავტომობილს შევამოწმებთ“.

შეგახსნებეთ, რომ ახალციხეში, საბარგო სადგურზე მდებარე ტექდათვალიერების ცენტრი, დიდი ნაკადის გამო, რიგში მდგომი ყველა მანქანის შემოწმებას ვერ ასწრებს. ამიტომ სამცხე–ჯავახეთში მძღოლები ტექდათვალიერების ცენტრის დამატებას ითხოვენ.

[ავთო ინასარიძე, ახალციხე]