ასოციაცია: ტექინსპექტირების რეფორმა ჩავარდნის ზღვარზეა

ასოციაციის პრეზიდენტმა დავით მესხიშვილმა ამის შესახებ „პერიოდული ტექნიკური ინსპექტირების მონიტორინგის“ პრეზენტაციისას ისაუბრა. მისი თქმით, რეფორმას პირველ რიგში „გრინვეი-საქართველოს“ და ეკონომიკის სამინისტროს შორის დადებული ხელშეკრულება აზარალებს, რაც სხვა კომპანიებს უთანასწორო მდგომარეობაში აყენებს.

„ჩვენი შესწავლის შედეგად მდგომარეობა არის არასახარბიელო. უფრო რეალურად თუ შევაფასებთ, მძიმეა. ტექნიკური ინსპექტირება დგას ჩავარდნის საფრთხის წინაშე იმ მარტივი მიზეზების გამო, რომ ერთი მხრივ ამ ბიზნესში არის უთანასწორობა, მეორე მხრივ ამ დარღვევებს ხედავს ყველა, მაგრამ რეაგირება არ ახლავს. საბოლოოს ზარალდება და ზიანდება ავტომფლობელი.კომპანია „გრინვეი - საქართველო” სარგებლობს პრივილეგიით სხვა მოქმედ კომპანიებთან შედარებით და ქმედებები წახალისებულია ეკონომიკის სამინისტროს მიერ. ასევე, „გრინვეი“ არ ასრულებს ეკონომიკის სამინისტროს მიერ დაპირებას გეოგრაფიული ხელმისაწვდომობის შესახებ. „გრინვეიმ” პრაქტიკულად უარი თქვა მთიანი მოსახლეობის მომსახურებაზე და დატოვა მომსახურების გარეშე 165 ათასზე მეტი მოსახლე, ეს არის ყაზბეგი, ადიგენი, შუახევი, ქედა და ა.შ“, - განაცხადა მესხიშვილმა.

ამჟამად, საქართველოს მასშტაბით, ტექინსპექტირების 24 ცენტრი და 35 მობილური ხაზი მოქმედებს.

ავტომობილების ტექნიკური ინსპექტირება სავალდებოლო 2018 წლის 1-ლი იანვრიდან გახდა, რეფორმის მიზანი ეკონომიკის სამინისტროს განმარტებით ევროკავშირის სტანდარტებთან დაახლოება, ეკოლოგიური მდგომარეობის გაუმჯობესება და ავტოსაგზაო შემთხვევების პრევენციაა.

[sknews.ge]