'როგორ გამორჩა სუს–ს ფაქტი, რომელმაც დიპლომატიურ სკანდალამდე მიგვიყვანა'– ხალილოვი

ზაურ ხალილოვმა ამის შესახებ "რადიო მარნეულთან" ისაუბრა.

ხალილოვის თქმით, სომხური და აზერბაიჯანული თემის დაპირისპირებამ ნათლად წარმოაჩინა საქართველოში მცხოვრები ეთნიკური უმცირესობების წარმომადგენლების პრობლემები, კერძოდ კი ის, რომ საქართველოს მოქალაქეები თავს სახელმწიფოს ნაწილად არ თვლიან.

"ამ შემთხვევაში ეთნიკურად სომეხი დეპუტატები ძეგლის გახსნაზე ისე წავიდნენ, რომ არ დაფიქრებულან თუ რა შედეგი შეიძლება გამოეწვია ამას საქართველოსათვის. რაც შეეხება ეთნიკურად აზერბაიჯანელ დეპუტატებს, ისინი ხმას მხოლოდ მაშინ იღებენ, როდესაც ამის დირექტივა აზერბაიჯანიდან მოდის. ისინი ამდენი წლის განმავლობაშ პარლამენტში არიან. უამრავი საკითხი მოხდა ქვეყანაში რაზეც ყველა თავის აზრს აფიქსირებდა და ესენი ჩუმად იყვნენ, ძეგლის დადგმაზე კი აჟიოტაჟი ატეხეს. სანამ აზერბაიჯანიდან არ მისცემენ შენიშვნებს მანამდე ისინი ხმას არ იღებენ", - ამბობს ხალილოვი.

ხალილოვი აღნიშნავს, რომ საქართველოს მთავრობა ცუდ მდგომარეობაშია, რადგან აზერბაიჯანის ხელისუფლება რეაგირებას ითხოვს. რეაგირება შესაძლოა ძეგლის დემონტაჟში გამოიხატოს, რამაც თავის მხრივ შესაძლოა ეთნიკური ნიშნით დაპირისპირების გაღვივება გამოიწვიოს.

ახალქალაქში, სოფელ ბუღაშენში ყარაბაღის ომის მონაწილის მიხეილ ავაქიანის ძეგლი 20 იანვარს დადგეს, ეს დღე აზერბაიჯანში საყოველთაო გლოვის დღედ არის გამოცხადებული, რომელიც 1990 წელს ყარაბაღში მომხდარ იანვრის სისხლიან ტრაგედიას ეძღვნება. ამ დღეს დაიღუპა 134 და დაიჭრა 700 მშვიდობიანი მოქალაქე. ამ ფაქტმა საზოგადოების და აზერბაიჯანული მხარის უკმაყოფილება გამოიწვია. მომხდარის გამო საქართველოს ელჩი განმარტებებისთვის დაიბარეს აზერბაიჯანის საგარეო საქმეთა სამინისტროში.

სამცხე–ჯავახეთში მოქმედი არასამთავრობო ორგანიზაციის წარმომადგენლები აცხადებენ, რომ ეს ფაქტი ორი ქვეყნის, აზერბაიჯანის და საქართველოს ურთიერთობებზე უარყოფითად აისახება, NGO–ები მომხდარში პასუხისმგებლობას ადგილობრივ თვითმმართველობას აკისრებენ. ახალქალაქის მუნიციპალიტეტის მერიაში კი აცხადებენ, რომ ძეგლის დადგმის შესახებ მათ ინფორმაცია არ ჰქონდათ.

იურისტი შოთა თუთბერიძე თვითმმართველობის პირველი პირების სამსახურეობივ გულგრილობაზე საუბრობს და ფაქტის შესწავლას ითხოვს. მათი განცხადებით უნდა მოხდეს ძეგლის დემონტაჟი, გარდა ამისა დაჯარიმდეს ის პირი, ვინც სოფელში მიხეილ ავაქიანის ძეგლი დადგა.

სოფელ ბუღაშენის მკვიდრი მიხეილ ავაკიანი მთიანი ყარაბაღის ომში 1994 წელს დაიღუპა, მისი ბიუსტი კი სოფლის ძველი სკოლის ეზოსთან, მალევე დადგეს.როგორც ადგილობრივები აცხადებენ ძეგლი დაზიანდა და ამიტომ ის ახლით ჩაანაცვლეს.

[sknews.ge]