ფოტო: jnews.ge
რეგიონში მცხოვრებ ეთნიკურად სომეხი მოსახლეობის უმეტესობას სოფელ ბუღაშენში ყარაბაღის ომის მონაწილის ძეგლის დადგმასთან დაკავშირებით საუბარი არ სურს, ნაწილი ამბობს რომ მომხდარის შესახებ ინფორმაცია არ აქვს, ნაწილი კი აცხადებს, რომ ძეგლის დადგმაში პობლემას ვერ ხედავს.
ალექსანდრე გაბრელიანი
„ეს საქართველოს არ გაუკეთებია, სომეხმა სომეხს დაუდგა ძეგლი. ვერ ვხედავ პრობლემას ამ ძეგლის დადგმაში. მესმის რომ საქართველოა, მაგრამ ზოგს პუტინი მოსწონს და ზოგს ამერიკის პრეზიდენტი, აქ რა შუაშია აზერბაიჯანი. სოფლის მოსახლეობამ თავის შვილს დაუდგა ძეგლი. თუ კანონი უკრძალავდათ ვერ დადგამდნენ ამ ძეგლს. რომ არ გაეხსნათ ეს ძეგლი აქაურ სომხებს ხომ ეწყინებოდათ?!“ – კითხულობს ახალციხცის მუნიციპალიტეტის სოფელ დიდი პამაჯის მცხოვრები ალექსანდრე გაბრელიანი.
აშოტ არუთუნიანი
თანასოფლელს ეთანხმება აშოტ არუთუნიანიც: „მე საერთოდ არ ვიცნობ მიხეილ ავაკიანს, არც ის ვიცი რა ძეგლი დადგეს, მაგრამ თუ დადგეს ამის უფლება აქვს იქაურ მოსახლეობას. ავაკიანი ბუღაშენიდან არის, იქ კი სომხები ცხოვრობენ“.
ამბარცუმ ბაბოიანი
„ძეგლი დადგმის საკითხში მე პრობლემას ვერ ვხედავ. ეს ვიღაცეების პროვოკაციაა, ზიან კომპიუტერთან და ავრცელებენ ინფრომაციებს. მსგავსი რამ ნებისმიერ ქვეყანაში შეიძლება გააკეთონ. სოფლის მცხოვრები იყო, წესიერი ადამიანი იყო, ამავე დროს მებრძოლი, ამიტომ დადგეს ძეგლი. ასეთი ძეგლი შეიძლებმა მარნეულშიც დადგან, ამაში პრობლემას ვერ ვხედავ“, – ამბობს ახალციხის საკრებულოს დეპუტატი ამბარცუმ ბაბოიანი.
ანა არუთუნიანი
ახალციხელი ანა არუთუნიანი ფიქრობს, რომ ძეგლის დადგმის საკითხი ორ ქვეყანას შორის კონფლიქტის მიზეზი არ უნდა გახდეს: „ამავე სოფლიდან იყო მიხეილ ავაქიანი და ალბათ ამის გამო გადაწყვიტეს ძეგლის დადგმა, სხვას ვერაფერს ვიტყვი. ეს არ უნდა გახდეს დაპირისპირების და უკმაყოფილების მიზეზი“.
ძეგლთან დაკავშირებით დაწყებული აჟიოტაჟი უკვირს ბუღაშენში მცხოვრებ ავეტის აპოსიანს. "ჩვენ გვინდა, რომ მიხეილ ავაქიანს მშობლიურ სოფელში, მისი ხსოვნის საპატივსაცემოდ ძეგლი ჰქონდეს. ეს სოფლის გადაწყვეტილება იყო", - ამბობს აპოსიანი jnews.ge-თან საუბარში.
ახალქალაქში სოფელ ბუღაშენში ყარაბაღის ომის მონაწილის მიხეილ ავაქიანის ძეგლი 20 იანვარს
დადგეს, ეს დღე აზერბაიჯანში საყოველთაო გლოვის დღედ არის გამოცხადებული, რომელიც 1990 წელს ყარაბაღში მომხდარ იანვრის სისხლიან ტრაგედიას ეძღვნება. ამ დღეს დაიღუპა 134 და დაიჭრა 700 მშვიდობიანი მოქალაქე. ამ ფაქტმა საზოგადოების და აზერბაიჯანული მხარის უკმაყოფილება გამოიწვია. მომხდარის გამო საქართველოს ელჩი განმარტებებისთვის დაიბარეს აზერბაიჯანის საგარეო საქმეთა სამინისტროში.
სამცხე–ჯავახეთში მოქმედი არასამთავრობო ორგანიზაციის წარმომადგენლები
აცხადებენ, რომ ეს ფაქტი ორი ქვეყნის, აზერბაიჯანის და საქართველოს ურთიერთობებზე უარყოფითად აისახება, NGO–ები მომხდარში პასუხისმგებლობას ადგილობრივ თვითმმართველობას აკისრებენ. ახალქალაქის მუნიციპალიტეტის მერიაში კი აცხადებენ, რომ ძეგლის დადგმის შესახებ მათ ინფორმაცია არ ჰქონდათ.
იურისტი შოთა თუთბერიძე თვითმმართველობის პირველი პირების სამსახურეობივ გულგრილობაზე საუბრობს და ფაქტის შესწავლას
ითხოვს. მათი განცხადებით უნდა მოხდეს ძეგლის დემონტაჟი, გარდა ამისა დაჯარიმდეს ის პირი, ვინც სოფელში მიხეილ ავაქიანის ძეგლი დადგა.
სოფელ ბუღაშენის მკვიდრი მიხეილ ავაკიანი მთიანი ყარაბაღის ომში 1994 წელს დაიღუპა, მისი ბიუსტი კი სოფლის ძველი სკოლის ეზოსთან, მალევე დადგეს.როგორც ადგილობრივები აცხადებენ ძეგლი დაზიანდა და ამიტომ ის ახლით ჩაანაცვლეს.
[sknews.ge]