ბაკურიანს საბაგირო გზები და სასრიალო ტრასები დაემატება

ბაკურიანში ახალი ინფარსტრუქტურის მოწყობასთან დაკავშირებით განცხადება, მთის კურორტების განვითარების კომპანიამ დღეს, 6 იანვარს გაავრცელა. კომპანიის ხელმძღვანელმა ბაკურიანის დამსვენებლებს მიმართა და საბაგირო გზებისა, სასრიალო ტრასების ნაკლებობის გამო, შექმნილი დისკომფორტისათვის ბოდიში მოუხადა.

„პირველ რიგში, სიხარულით მინდა აღვნიშნო, რომ ძალიან ბევრი ადამიანის შრომამ შედეგი გამოიღო და ტურისტების ნაკადმა ყველა მოლოდინს გადააჭარბა, განხორციელდა უამრავი ახლი, თანამედროვე ინფრასტრუქტურული პროექტი. თუმცა დამსვენებელთა მატებამ პრობლემები შექმნა სხვადასხვა სფეროში. ეს პრობლემები განსაკუთრებით თვალნათლივ ბაკურიანში გამოიკვეთა. ძალიან ბევრ დამსვენებელს, სამწუხაროდ, დაემატა რამოდენიმე დღიანი ქარიშხლები, რის გამოც გაითიშა დიდველის საბაგიროები, ამიტომ მთელი დატვირთვა გადავიდა "კოხტა-მიტარბი"-ს სასრიალო არეალზე, რამაც წარმოქმნა რიგები სალაროებთან და სადგურებთან, ასევე, პრობლემები შეექმნა სასრიალო ტრასებს (თოვლის ნაკლებობის გამო). მინდა გითხრათ, რომ დაწყებულია კოხტა-მიტარბის ხელოვნური გათოვლიანების პროექტირება და უახლოეს 2 წელიწადში, საბოლოოდ გადაიჭრება "კოხტა-მიტარბის" უთოვლობის პრობლემა. ასევე, ტურისტების ზრდამ ნათლად დაგვანახა, რომ ბაკურიანი განიცდის საბაგირო გზებისა და სასრიალო ტრასების ნაკლებობას, რომელთა დამატებასაც ასევე უახლოვეს პერიოდში ვგეგმავთ",–ნათქვამია მთის კურორტების კომპანიის ხელმძღვანელის მიერ გავრცელებულ განცხადებაში.

თაზო გამცემლიძის თქმით, ბაკურიანს დაემატება გაყიდვების წერტილები და ამუშავდება ახალი "ონლაინ" გაყიდვების სისტემა–"მთავრობასთან და პარტნიორ კომპანიებთან ერთად, აქტიურად ვმუშაობთ ძალიან საინტერესო პროექტებზე და პრობლემების გადაჭრაზე, ოთხივე ზამთრის კურორტზე, რაც ძალიან მალე დადებითად აისახება საქართველოს სათხილამურო არეალებზე".

[sknews.ge]