მერებმა ინფრასტრუქტურის მინისტრის მოადგილესთან ერთწლიანი მუშაობა შეაჯამეს

შეხვედრაზე, მუნიციპალიტეტების მერებმა მიმდინარე წელს განხორციელებული პროექტები განიხილეს. როგორც სამცხე–ჯავახეთის ადმინისტრაციის რეგიონული პროექტების კოორდინირების უფროსი მარინა გაჩეჩილაძე ამბობს, სამცხე–ჯავახეთი რეგიონებს შორის ერთ–ერთი პირველია პროექტების შესრულების კუთხით: „პროექტების მართვის თვალსაზრისით და საკასო შესრულების მიხედვით პირველ ადგილზე ვართ“.

შეხვედრის მონაწილეებმა 2019 წელს განსახორციელებელი პროექტებიც მიმოიხილეს. ერთ–ერთი რაც ცენტრალური ბიუჯეტიდან მომავალი წლისთვის რეგიონში დაფინანსდება, ქალაქებსა და სოფლებში სანიაღვრე არხების მოწყობა იქნება.

ადიგენის მერმა ზაქარია ენდელაძემ მინისტრის მოადგილესთან დერცელი–კიკიბოს დამეწყრილი გზის საკითხი დააყენა. მისი თქმით, გზა ერთი წელია დამეწყრილია და უკვე არსებობს ალტერნატიული გზის პროექტი, თუმცა ფინანსების არ ქონის გამო, მშენებლობა ვერ იწყება: „ახლაც გზაზე ცუდი მდგომარეობაა, გამორიცხული არ არის მეწყერული პროცესები ისევ განვითარდეს, ჩვენ კიდევ ფინანსების არარსებობის გამო, გზის მშენებლობას ვერ ვიწყებთ“.

როგორც შეხვედრაზე ილია ბეგიაშვილმა განაცხადა, „ინფრასტრუქტურის სამინისტრო აღნიშნულ საკითხს განიხილავს“.

დღევანდელ შეხვედრაზე გახდა ცნობილი, რომ ტენდერებში კომპანიების მონაწილობის რეგულაციები მარტივდება. „აქამდე ახლადშექმნილ კომპანიებს ტენდერებში მონაწილეობის მიღების საშუალება არ ჰქონდათ, ახლა ასე აღარ იქნება. ეს პროცედურები მარტივდება და ვფიქრობ, ამით ბიზნესს ხელი შეეწყობა“, – ამბობს მარინა გაჩეჩილაძე.

შეხვედრის მონაწილეების განცხადებით, 2019 წლიდან „სოფლის მხარდაჭერის პროგრამა“ აღდგება და საკუთარი სოფლის პრიორიტეტებს ისევ ადგილობრივები შეარჩევენ.



[ლუბა გიორგაძე, ახალციხე]