ფინანსთა სამინისტროს მომსახურების სააგენტომ ახალციხეში გაცნობითი შეხვედრა გამართა

შეხვედრას, რომელიც სამცხე-ჯავახეთის სახელმწიფო სასწავლო უნივერსიტეტის მეორე კორპუსის საკონფერენციო დარბაზში გაიმართა, რეგიონის ექვსივე მუნიციპალიტეტის წარმომადგენლები ესწრებოდნენ.

„ჩვენ განვიხილეთ ელექტრონული პორტალის www.eauction.ge-ს მუშაობა, თუ რა სერვისები შეუძლია შესთავაზოს მოსახლეობას, ასევე ვისაუბრეთ მკაცრი აღრიცხვის დოკუმენტების რეგისტრაციასთან დაკავშირებულ საკითხებზე. მოსახლეობა დაინტერესდა, როგორ უნდა მოგვმართონ და განათავსონ ინფორმაცია ვებ-გვერდზე, ასევე დაისვა კითხვები სატარიფო გეგმასთან დაკავშირებით“, - განმარტავს საქართველოს ფინანსთა სამინისტროს მომსახურების სააგენტოს გენერალური დირექტორის პირველი მოადგილე ქეთევან კიკნაძე.

ფინანსთა სამინისტროს მომსახურების სააგენტოს წარმომადგენლები სამცხე-ჯავახეთის მოსახლეობას დღეს პირველად შეხვდნენ.

„ეს იყო გაცნობითი ხასიათის შეხვედრა, რომელიც ითვალისწინებდა, როგორც სახელმწიფო დაწესებულებების, ასევე კერძო და იურიდიულ პირებისთვის ინფორმაციის მიწოდებას, რა ფუნქცია აქვს ჩვენს ორგანიზაციას, როგორ ხორციელდება ჩვენს ვებ-გვერდზე ყიდვა-გაყიდვის პროცედურები, მკაცრი აღრიცხვის ბარათებთან დაკავშირებული პროცედურები და ასე შემდეგ“, - ამბობს ფინანსთა სამინისტროს მომსახურების სააგენტოს სამცხე-ჯავახეთის სამმართველოს უფროსი გიორგი კახნიაშვილი.

შეხვედრაზე აღინიშნა, რომ ფინანსთა სამინისტროს მომსახურების სააგენტოს ვებ-გვერდზე სამცხე-ჯავახეთის რეგიონის მოსახლეობა ნაკლებად აქტიურობს.

„გასულ წელს გვქონდა შეხვედრები და თბილისში გვყავდა მოწვეული სხვადასხვა რეგიონის წარმომადგენლები, მაგრამ რადგან ვიგრძენით, რომ გარკვეულ რეგიონებში არის ჩავარდნები, ნაკლები აქტიურობა შეინიშნება, ამიტომ გადავწყვიტეთ ვესტუმროთ თითოეულ რეგიონს და შევთავაზოთ ჩვენი სერვისები“, - ამბობს ქეთევან კიკნაძე.

სააგენტოს წარმომადგენლების თქმით, სამცხე-ჯავახეთის შემდეგ მოსახლეობას სხვა რეგიონებშიც შეხვდებიან და აღნიშნულ საკითხებთან დაკავშირებით ინფორმაციას მიაწვდიან.

[თამარ თოთაძე, ახალციხე]