რა უნდა ცხენს ფინანსთა სამინისტროს მომსახურების სააგენტოს ეზოში

სახელმწიფოს განსაკარგავად გადაცემულ მანქანებს, ხე-მასალასა და სხვა ნივთებს შორის, ფინანსთა სამინისტროს მომსახურების სააგენტოს სამცხე-ჯავახეთის რეგიონული სამმართველოს ტერიტორიაზე, რამდენიმე დღეა, ცხენიც გამოჩნდა.

ცხენი თურქეთის მოქალაქეს, ყარსის რაიონის დაბა არაფაჩაიში მცხოვრებ ბულენტ ერდაგს ეკუთვნოდა. მან 2014 წლის 9 იანვარს, ასპინძის მუნიციპალიტეტში საქართველო-თურქეთის საზღვარი უკანონოდ გადმოკვეთა. ბულენტ ერდაგი ცხენით საქართველოს ტერიტორიაზე შვიდ კილომეტრში შემოვიდა. იგი სასაზღვრო პოლიციის თანამშრომლებმა დააკავეს. ბრალი 11 იანვარს, სსკ-ის 334-ე მუხლის პირველი ნაწილით წარედგინა.

ახალციხის რაიონული სასამართლოს მოსამართლის მარიკა ჩიტაშვილის გადაწყვეტილებით (საქმე N 1/035-14წ), ერდაგს დანაშაულის ჩადენისთვის სასჯელის სახედ ჯარიმა 5000 ლარი, ასევე ქონების ჩამორთმევა განესაზღვრა. კერძოდ, მან სახელმწიფოს საკუთრებაში უსასყიდლოდ ერთი სული ცხენი გადასცა.

„ერდაგთან საპროცესო გაფორმდა და გაათავისუფლეს, ის უკვე საკუთარ სახლშია“, - ამბობს ბულენტ ერდაგის ადვოკატი კახა ასპანიძე და ამატებს, რომ თუ ერდაგი გამართლდებოდა, მაშინ ჩამორთმეულ ცხენს უკან დაუბრუნებდნენ, მაგრამ გამამართლებელი განაჩენი ვერ დადგებოდა, რადგან იგი საქართველოს ტერიტორიაზე დააკავეს.

ჩამორთმეულ ცხენი შესანახად ჯერ შსს სასაზღვრო პოლიციის N2 სამმართველოს (ახალციხე) N5 სასაზღვრო სექტორ „ნიალას“ გადაეცა, შემდეგ კი ფინანსთა სამინისტროს მომსახურების სააგენტოს სამცხე-ჯავახეთის რეგიონულ სამმართველოს.

როგორც ფინანსთა სამინისტროს მომსახურების სააგენტოს სამცხე-ჯავახეთის რეგიონული სამმართველოს უფროსი გოდერძი ტაბატაძე ამბობს, 16 მაისს ცხენს გასაყიდად აუქციონზე გაიტანენ.

სააგენტოს ტერიტორიაზე არსებული ცხენის შესახებ ინფორმაცია დღეს „ერთიანი ნაციონალური მოძრაობის“ ახალციხის რაონულმა ოფისმა, ფეისბუქის გვერდზე გაავრცელა.

„გარემოს დაცვის სააგენტოს მუშაკებმა, ახალციხის მუნიციპალიტეტის სოფელ მუსხის მკვიდრი გ.მ და მისი ცხენი დააჯარიმეს სახელმწიფო ქონების მისაკუთრებისთვის. ფაქტი კი შემდეგში მდგომარეობს, 10 მაისს, გ.მ–მ მდინარე ურავლის წყლის ნაპირზე შეშა მოაგროვა და თავისი ცხენით სახლში მიჰქონდა, რა დროსაც გარემოს დაცვის სააგენტოს მუშაკებმა დააჯარიმეს, ცხენი ჩამოართვეს და მოსახურების სააგენტოს საჯარიმო სადგომზე გადაიყვანეს“, – წერს ახალციხე ენმ და ამ შემთხვევას სამარცხვინოს უწოდებს.

თუმცა, როგორც ტაბატაძე აცხდებს, მსგავს ფაქტს ადგილი არ ჰქონია: „შესაძლოა, ვიღაცა დააჯარიმეს კიდეც, მაგრამ ამის შესახებ ნამდვილად არაფერი ვიცი. ეს ცხენი ნამდვილად თურქეთის მოქალაქეს ეკუთვნოდა“.

„ერთიანი ნაციონალური მოძრაობის“ ახალციხის რაიონული ორგანიზაციის ხელმძღვანელი და ახალციხის მერობის კანდიდატი, გელა დემეტრაძე ამბობს, რომ აღნიშნული ინფორმაცია ერთ–ერთი მოქალაქის ნაამბობზე დაყრდნობით გაავრცელეს.



[თამუნა უჩიძე, ახალციხე]