ჯანდაცვის სამინისტრო საყოველთაო ჯანდაცვის პროგრამის მიმდინარეობით დაინტერესდა

საყოველთაო ჯანდაცვის სახელმწიფო პროგრამის მეორე ეტაპი 1 ივლისს დაიწყო. სამინისტროს წარმომადგენლები ახალციხეში ერთი თვის განმავლობაში გაწეული მომსახურებით დაინტერესდნენ.

„ჯანმრთელობის დაცვის სამინისტრო და სოციალური მომსახურების სააგენტო ვმართავთ შეხვედრებს სამედიცინო დაწესებულებების წარმომადგენლებთან, რათა შევაჯამოდ ამ ერთი თვის განმავლობაში გაწეული მუშაობა და ვისაუბროთ იმ პრობლემებზე, რამაც თავი იჩინა პროგრამის განხორციელების პროცესში“, - განმარტავს სოციალური მომსახურების სააგენტოს უფროსი ნოე ქინქლაძე და ამატებს, რომ სამედიცინო დაწესებულებების ხელმძღვანელებთან შეხვედრამ აჩვენა, რომ აღნიშნული პროგრამა ნორმალურად, ექსცესების გარეშე მიმდინარეობს, - ძალიან ბევრი შემთხვევა დაფინანსდა სახელმწიფოს მიერ, როგორც მშობიარობა, ასევე განხორციელდა ონკოლოგიური პაციენტების მომსახურება, ჩვენ ვაფასებთ, რომ პროგრამა არსებითი პრობლემების გარეშე მიმდინარეობს“.

ჯანდაცვის მინისტრის მოადგილემ აღნიშნა, რომ პროგრამის მიმდინარეობის პროცესში განსაკუთრებული პრობლემები არ ყოფილა.

„არსებობდა პაციენტთა იდენტიფიკაციის კუთხით გარკვეული შეკითხვები, რომლებსაც ერთად გავივლით და შევაჯერებთ, კონკრეტულ შემთხვევაში როგორ უნდა მოიქცეს, როგორც სამედიცინო დაწესებულების ხელმძღვანელი, ასევე ექიმი“, - განაცხადა ჯანდაცვის მინისტრის მოადგილემ მარიამ ჯაშმა.

დღევანდელ შეხვედრას სამცხე-ჯავახეთის ექვსივე მუნიციპალიტეტის სამედიცინო დაწესებულებების წარმომადგენლები ესწრებოდნენ.

„ძალიან დიდი შვებაა მოსახლეობისთვის, განსაკუთრებით 6-დან 60-წლამდე ადამიანებისთვის, რომლებიც მანამდე არ იყვნენ დაზღვეული და პირველი ივლისიდან დაემატა სერიოზული პაკეტი, რასაც ჰქვია გეგმიური შემთხვევების მართვა. ეს ძალიან დიდ მხარდაჭერას მოუტანს ჩვენს მოსახლეობას და ძალიან კარგი პროგრამაა“, - ამბობს შპს „ახალციხის კლინიკა იმედის“ დირექტორი დავით მაისურაძე.

საყოველთაო ჯანდაცვის სახლმწიფო პროგრამის პირველი ეტაპი საქართველოში მიმდინარე წლის თებერლიდან ამოქმედდა. სამცხე-ჯავახეთის სოციალური მომსახურების სააგენტოში ამბობენ, რომ საყოველთაო ჯანდაცვის პროგრამით მოსარგებლე ადამიანების რიცხვი საკმაოდ მაღალია.

„დღეის მდგომარეობით, თებერვლიდან მოყოლებული, გადაუდებელი ამბულატორიული მომსახურების 1346 შემთხვევა გვაქვს, გადაუდებელი სტაციონარული მომსახურების - 246. 1 ივლისიდან დღემდე საკეისრო კვეთის 11 და ფიზიოლოგიური მშობიარობის 99 შემთხვევაა“, - განმარტავს სამცხე-ჯავახეთის სოციალური მომსახურების სააგენტოს უფროსის მოადგილე ლუიზა იოსელიანი.

დღესვე მოსახლეობას დაურიგდა ქართულ და სომხურ ენებზე დაბეჭდილი საინფორმაციო ბუკლეტები საყოველთაო ჯანდაცვის პროგრამის შესახებ.

შეხვედრის შემდეგ სამინისტროს წარმომადგენლებმა სამედიცინო დაწესებულებები მოინახულეს.

[თამარ თოთაძე, ახალციხე]