10 წამში მოგებული ბრძოლა – ამირან გოგოლაძე ინგუშეთიდან გამარჯვებული დაბრუნდა [Video]

„ვარჯიში 14 წლისამ დავიწყე, ინტერნეტში ქართველი მებრძოლების ჩანაწერებს ვუყურებდი და ვოცნებობდი, რომ საქართველოში მეც ასე მებრძოლა. 2014 წელს ბორჯომიდან ახალციხეში გადმოვედი და დავიწყე კიკბოქსინგზე ვარჯიში, რაც ექვს თვეს გაგრძელდა. მერე გავიგე, რომ ახალციხეში MMA გაიხსნა და მირჩიეს მიშა მესხთან მივსულიყავი, მას შემდეგ „13 ლეგიონის“ მებრძოლი ვარ“, – გვიყვება ამირანი.

გოგოლაძე ინგუშეთში ფინელ მეტოქეს 17 ნოემბერს შეხვდა: „ბრძოლამდე მეტოქის ჩხუბს რომ ვუყურებდი, ფიზიკურად ჩემზე ძლიერი იყო, ძირითადად ჭიდაობით და მტკივნეული ილეთებით იგებდა. ბრძოლის დაწყებამდე ტაქტიკა მოფიქრებული მქონდა, რამდენიმე წუთი უნდა მემოძრავა და გავხურებულიყავი. ჩემი სახელი რომ გამოაცხადეს, ზურგზე ჩემი დროშა მქონდა მოკიდებული, რინგზე რომ ავდიოდი და ამ დროშას ხელით ვეხებოდი, ვგრძნობდი რომ გავიმარჯვებდი“.

ამირანმა ბრძოლამდე 10 დღით ადრე, თავის ტრავმა მიიღო, ამის გამო მეტოქესთან შეხვედრამდე განსაკუთრებით ნერვიულობდა: „თავი კედელს ჩამოვარტყი და გავითიშე, მცირე ტვინის შერყევა მქონდა. ამიტომ ოდნავ ხელის მოხვედრაზე თავბრუსხვევა მეწყებოდა, ბრძოლისას რომ მომხვედროდა თავზე ხელი, საქმე ცუდად წავიდოდა, მაგრამ თქვენც ნახეთ რაც მოხდა“.



სპორტსმენს ამ დრომდე წაგებული ერთადერთი ბრძოლა აქვს. ამბობს, რომ ყირგიზეთში პირველ რაუნდში ხელი მოიტეხა და მიზეზი ეს იყო: „ყირგიზეთიდან რომ დავბრუნდი, სულ შემეცვალა აზროვნება, ეს მარცხი რომ არ მქონოდა, ალბათ ასეთი არ ვიქნებოდი. სხვანაირად დავინახე როგორ უნდა მებრძოლა, რინგზე რა უნდა მეკეთებინა. ეს მარცხი იყო წინაპირობა, რომ მომდევნო ბრძოლებში უფრო მაგრად წარმომედგინა ჩემი თავი“.

მარცხის შემდეგ გოგოლაძემ M-1 Challenge - ის ეგიდით სამჯერ რუს მეტოქეებთან იბრძოლა და სამჯერვე გაიმარჯვა. ინგუშეთში გამარჯვება კი მისთვის მეოთხე დიდი წარმატება იყო: „ინგუშეთში მარცხი სამი ნაბიჯით უკან დახევას ნიშნავდა. ამიტომ ამ ბრძოლაში ყველაფერი ჩავდე. ახლა უკვე დიდი იმედი მაქვს, რომ მალე ქამარზე ბრძოლა მომიწევს“.

[ავთო ინასარიძე, ნანა ინასარიძე, ახალციხე]