მე-13 ლეგიონის სპორტსმენი უკრაინელ პაველ კუშს შეებრძოლება

მთავარი → სიახლე, საზოგადოება 28.08.2020

სამცხე-ჯავახეთის შერეული ორთაბრძოლების კლუბის მებრძოლი, ამირან გოგოლაძე გერმანიაში, ქალაქ დიუსელდორფში უკრაინელ მებრძოლთან, პაველ კუშთან შეხვედრისთვის ემზადება.

ამირან გოგოლაძეს, 32 წლის პაველ კუშთან ბრძოლა 5 სექტემბერს მოუწევს. მოწინააღმდეგეს 30 ბრძოლიდან მხოლოდ შვიდი წაგება აქვს. ისინი ერთმანეთს 77 კილოგრამ წონით კატეგორიაში შეხვდებიან.

გოგოლაძე ამბობს, რომ ორივეს თანაბარი შანსი აქვს. 5 სექტემბერს დიუსელდორფში ორი ბრძოლა გაიმართება, საბოლოოდ გამარჯვებული EMC-ს ქამარს მიიღებს.

„პაველ კუში ძლიერი მოწინააღმდეგეა. თავისუფალი სტილით მოჭიდავეა. 30 ბრძოლიდან 23 აქვს მოგებული და აქედან 20 მტკივნეული ილეთით. ის ცდილობს მოწინააღმდეგე პარტერში ჩაიყვანოს და იქ დაამარცხოს. ყველას თანაბარი შანსები გვაქვს, წინასწარ ვერ ვიტყვი, ყველაფერი რინგზე ასვლის შემდეგ გადაწყდება. ამ ბრძოლებში ქამრის მოპოვება ჩემთვის მნიშვნელოვანია, რადგან კიდევ ერთი გადადგმული ნაბიჯია UFC-ის ორგანიზაციაში მოსახვედრად“, - ამბობს გოგოლაძე.

შეხვედრა “ELITE MMA”-ის მიერაა ორგანიზებული.

[მარიამ ბარძიმაძე]