ზურაბიშვილის მხარდამჭერ კონცერტზე ადგილობრივები მიკროავტობუსებით ჩამოიყვანეს

თამარ მეფის ძეგლის მიმდებარე ტერიტორიაზე კონცერტი 19:00 საათზე დაიწყო. სხვადასხვა სიმღერებს ბექა ჩხაიძე, სალომე ბაკურაძე, სალომე გოგიაშვილი, ჯემალ სეფიაშვილი, აჩი ფურცელაძე, ჯგუფი „ალილო“ და ანსამბლი "ფორტე" ასრულებენ.

კონცერტის მიმდებარედ გიორგიწმინდის, კლდის, ხიზაბავრის, ახალდაბის, ხეოთის, სხვილისის და სხვა სოფლების მიკროავტობუსები დგას.

„სამი მარშუტკით და პატარა მანქანებით წამოვედით სხვილისიდან. ზურაბიშვილს ვუჭერთ ყველა მხარს. გახსოვთ როგორი გაბრწყინებული იყო საქართველო როცა ქალი მეფე თამარი გვყავდა?! ისე აყვავდება ქვეყანა ზურაბიშვილს თუ ავირჩევთ“, – ამბობს სხვილისში მცხოვრები როზა სარქისიანი.

ზურაბიშვილს უჭერს მხარს ახალდაბიდან ჩამოსული ნუნუ ლომსაძეც: „სალომეს მხარდასაჭერად მოვედი აქ. დარწმუნებული ვარ, თუ მას ავირჩევთ, ქვეყანა წინ წავა“.

ზურაბიშვილის გამარჯვებაში და ქვეყნის წინსვლაში დარწმუნებულია სოფელ ხეოთის სკოლის თანამშრომელი ნანა მოთიაშვილიც: „25 კაცი ვართ ხეოთიდან, სკოლის მთელი ტექნიკური პერსონალი წამოვედით“, – გვითხრა მან.

კონცერტზე ზურაბიშვილის მხარდამჭერი მოწოდებები კეთდება. გამომსვლელები ხალხს არჩევნებზე მისვლასა და მმართვლი გუნდის მხარდაჭერილი კანდიდატის შემოხაზვას სთხოვენ.





[sknews.ge]