სამცხე–ჯავახეთის გუბერნატორი სალომე ზურაბიშვილის განცხადებებზე

„რა თქმა უნდა ვეთანხმები გადაწყვეტილებას ზურაბიშვილის მხარდაჭერის საკითხში. მე გუნდური მოთამაშე ვარ, წარმოვადგენ ხელისუფლებას და რა თქმა უნდა, ვიზიარებ მათ ამ პოზიციას. სალომე ზურაბიშვილი ძალიან დიდი პოლიტიკოსია, დიდი საგარეო ურთიერთობების გამოცდიელბა აქვს და ვფიქრობ, ამ ადამიანის გაპრეზიდენტება ჩვენ ქვეყანას საგარეო ურთიერთობების კუთხით და საიმიჯოდ ძალიან წაადგებაა“, – განაცხადა სამცხე–ჯავახეთის გუბერნატორმა ბესიკ ამირანაშვილმა „სამხრეთის კარიბჭეს“ ყოველკვირეულ გადაცემაში „კვირის აქცენტში“.

შეკითხვაზე: მაშინ როცა ომის საკითხი ჰააგის სასამართლოში იხილება, ზურაბიშვილმა კი ჯერ განაცხადა, რომ „ომი საქართველომ დაიწყო“ და მოგვიანებით კი თქვა, რომ „ჩვენ დავბომბეთ, ჩვენი მოსახლეობა“, ლახავს თუ არა ეს ქვეყნის საერთაშორისო იმიჯს, ამირანაშვილი გვპასუხობს: „როგორც ჩემთვის ცნობილია მან თავისი პირველი განცხადება [ომი საქართველომ დაიწყო] ახსნა და ამის შემდეგ დაუჭირა მას მმართველმა პარტიამ მხარი. ამ ბოლო განცხადებაზე [ჩვენ დავბომბეთ ჩვენი მოსახლეობა] არ მაქვს ინფორმაცია, რადგან ინტენსიურად დავდივარ მუნიციაპლიტეტებში და ვეცნობი პროექტებს. შესაბამისად ამაზე კომენტარს არ და ვერ გავაკეთებ“.

ასევე, შეკითხვაზე, როგორც მმართველი გუნდის ერთ–ერთი წევრი, რას უპასუხებს, მათ ვინც ფიქრობს, რომ ზურაბიშვილის ამ განცხადებების შემდეგ მმართველი გუნდის მისადმი მხარდაჭერა არის რუსეთის დაკვეთა, ამირანაშვილი ამბობს: „ამ კითხვაზე პასუხი მარტივია, ჩვენი მთავრობის კურსი არის ნათელი, ეს არის დასავლური კურსი. ყველა ნაბიჯი, რომელიც ჩვენი ქვეყნის მიერ არის გადადგმული არის დასავლური კურსის მხარდაჭერა. შესაბამისად ვფიქრობ, რომ ეს შეკითხვა არ არის რელევანტური“.

ამირანაშვილი ფიქრობს, რომ სამცხე–ჯავახეთში ზურაბიშვილს მხარდაჭერა ექნება: „რადგან ზურაბიშვილს დიდი საერთაშორიო გამოცდიელბა და დიდი ისტორია და წარსული აქვს“.

[თამუნა უჩიძე, ახალციხე]