ახალციხეში ბავშვთა დაცვის საერთაშორისო დღე აღნიშნეს

ახალციხის ცენტრალურ პარკში დილიდან ხალხმრავლობა იყო. მესხეთის სახელმწიფო დრამატული თეატრის წინ შეკრებილი პატარები მულტფილმის გმირებთან ერთად გაერთნენ. პარკში შეკრებილი იყვნენ ახალციხის სკოლამდელი დაწესებულების აღსაზრდელები, მეშვიდე საჯარო სკოლის მოსწავლეები და მოქალაქეები.

ახალციხის მუნიციპალიტეტის კულტურის სამსახურის ორგანიზებით გამართულ კონცერტში, მეხუთე საჯარო სკოლის მუსიკალურმა სტუდია ”პალიტრამ” და სკოლამდელი დაწესებულებების პატარა ვოკალისტებმა მიიღეს მონაწილეობა. ბავშვებმა ფერადი ცარცებით ასფალტიც მოხატეს. საუკეთესო ნახატის ავტორები კულტურის სამსახურმა დააჯილდოვა.

”ჩვენს ქალაქში უკვე რამდენიმე წელია ტრადიციად ჩამოყალიბდა ბავშვთა დაცვის საერთაშორისო დღის აღნიშვნა, ვცდილობთ, რომ დღევანდელი დღე ბავშვებს დღესასწაულად ვუქციოთ”, - ამბობს ახალციხის მუნიციპალიტეტის კულტურის სამსახურის წამყვანი სპეციალისტი მარინე გოგოლაძე.

ღონისძიების ორგანიზებაში კულტურის სამსახურთან ერთად არასამთავრობო ორგანიზაცია “World Vision საქართველოს” წარმომადგენლებიც იყვნენ ჩართული, რომლებმაც ბავშვებს ბუშტები და ტკბილეული დაურიგეს. ახალციხის მუნიციპალიტეტის გამგეობამ ღონისძიებაზე მისული პატარები ნაყინითაც დაასაჩუქრა.



[თამარ თოთაძე, ახალციხე]