ზაზა სარალიძეს ბრალი წარუდგინეს

სარალიძეს ბრალი სისხლის სამართლის კოდექსის 353-ე პრიმა მუხლის პირველი ნაწილით წარუდგინეს, რაც სამსახურეობრივი მოვალეობის შესრულების დროს პოლიციელზე თავდასხმას გულისხმობს. ბრალის დამტკიცების შემთხვევაში, მას ოთხიდან შვიდ წლამდე პატიმრობა ემუქრება.

"ბრალდების ძირითადი ფორმულირება აგებულია არასწორ ფაქტებზე. რასაც არ ვეთანხმებით. საპატიმრო ღონისძიება მოხსნილია, თუმცა, ჯანმრთელობის მდგომარეობიდან გამომდინარე, იგი კვლავ რჩება საავადმყოფოში”, – წერს ზაზა სარალიძის ადვოკატი ნესტან ლონდარიძე ფეისბუქის პირად გვერდზე.

ზაზა სარალიძე შეუძლოდ მას შემდეგ გახდა, რაც იგი რუსთაველის გამზირზე პოლიციასთან დაპირპირების გამო დააკავეს.

ზაზა სარალიძის შვილი დავით სარალიძე 2017 წლის დეკემბერში მოკლეს. მას შემდეგ ზაზა სარალიძე შვილის მკვლელების გამოვლენასა და დასჯას უშედეგოდ ითხოვს. სახელმწიფომ ამ დრომდე ვერ შეძლო ამის გაკეთება. სარალიძე უკვე რამდენიმე თვეა, ამ მოთხოვნით საპროტესტო აქციებს ღია ცის ქვეშ მართავს. მას სამართალდამცავები რუსთაველის გამზირზე კარვის გაშლის უფლებას არ აძლევენ. სახალხო დამცველისა და არასამთავრობო ორგანიზაციების განცხადებით, ამ აკრძალვით შსს კონსტიტუციას არღვევს. ინციდენტი, რომლის შემდეგაც სარალიძე დააკავეს, სწორედ პოლიციის მიერ კარვის გაშლის ხელშეშლას მოჰყვა.

[sknews.ge]