‘ოცნების’ რაიონული შტაბები მითითებებს ცენტრიდან ელიან

ახალციხეში „ქართული ოცნების“ საოლქო ორგანიზაციას არჩევნებისთვის მზადება ჯერ არ დაუწყია. თავმჯდომარე გიორგი კოპაძე ამბობს, რომ აქტივობები, იმ შემთხვევაში ექნებათ, თუ ამას დაავალებენ: „პარტია მხარს უჭერს სალომე ზურაბიშვილის კანდიდატურას და ჩვენ ჩვენი კანდიდატი არ გვყვას. ამიტომ მისი მხარდამჭერი აქტივობები იმ შემთხვევაში გვექნება, თუ ამას დაგვავალებს პარტია“.

რა ფორმით იმუშავებს შტაბი, ამის შესახებ ჯერ არც ასპინძის საოლქო ორგანიზაციაში იციან: „პარტიაში იქნება ამ საკითხის განხილვა და რა დირექტივებსაც მივიღებთ, იმის მიხედვით ვიმოქმედებთ. ყველაფერს გავაკეთებთ არჩევნების კანონიერად ჩატარებისთვის“, – ამბობს „ქართული ოცნების“ ასპინძის საოლქო ორგანიზაციის თავმჯდომარე და მუნიციპალიტეტის მერი როსტომ მაგრაქველიძე.

„ქართული ოცნების“ ადიგენის საოლქო ორგანიზაციის თავმჯდომარე და ასევე, მუნიციპალიტეტის მერი ზაქარია ენდელაძე აცხადებს, რომ მათი პარტიული ოფისი სამუშაოდ უკვე მზადაა: „ჩვენ შტაბი ყოველთვის ღია გვაქვს, ჩვენი აქტივისტებიც გვყვავს და წინასაარჩევნო კამპანიაში ჩართვა ნებისმიერ დროს შეგვიძლია“.

ცენტრალური ოფისიდან მითითებებს ელიან ნინოწმინდაში, ახალქალაქსა და ბორჯომში „ქართული ოცნების“ საოლქო ორგანიზაციებიც.

რეგიონში მუნიციპალიტეტების მერები იმდევონებენ, რომ კანდიდატი რომელსაც მხარს უჭერენ, საკმარისი ხმების რაოდენობის მოგროვებას შეძლებს.

„რამდენადაც ვიცი, არ უნდა იყოს ცუდი პიროვნება, გამოცდილი ქალბატონია და ალბათ ეს ხალხსაც წაადგება და მხარს დაუჭერენ“, – ამბობს ახალქალაქის მერი იური უნანიანი.

ზურაბიშვილის პოლიტიკურ გამოცდილებაზე აკეთებს აქცენტს ნინოწმინდის მერი ანივარდ მოსოიანი: „კარგი დიპლომატიური გამოცდილება აქვს. ვფიქრობ, რომ ჩვენ ქვეყანას გამოადგება. გარდა ამისა, ნინოწმინდელებმა ქალი კანდიდატი ერთხელ უკვე აირჩიეს და არც ახლა გაგვიცრუებენ იმედებს ალბათ“.

„პარტია უჭერს მხარს და ალბათ ხალხიც აირჩევს, ეხლა მეტს ვერაფერს ვიტყვი, დრო გვიჩვენებს ყველაფერს“, – ამბობს ახალციხის მერი ზაზა მელიქიძე.

რამდენად ექნება მხარდაჭერა სალომე ზურაბიშვილს ასპინძაში ამაზე წინასწარ საუბარი უჭირს როსტომ მაგრაქველიძესაც: „29 ოქტომბერს გეტყვით, გახდება თუ არა ასპინძელების რჩეული სალომე ზურაბიშვილი, ახლა სხვა არაფრის თქმა შემიძლია“.

იურისტების განმარტებით „ქართულ ოცნებას“ პარტიის რესურსის წინასაარჩევნოდ გამოყენება ეკრძალება: „მათ არ შეუძლიათ თავიანთი ოფისის, ან შეხვედრებზე თავიანთი სიმბოლოების გამოყენება. მმართველ პარტიას ზურაბიშვილისთვის დახმარება მხოლოდ პარტიის შემომწირველებით შეუძლია, ორონდ ესეც ნებაყოფლობითი უნდა იყოს, ძალდატანება დაუშვებელია“, – ამბობს ახალგაზრდა იურისტთა ასოციაციის იურისტი ქეთი ბებიაშვილი.

პარტია „ქართულმა ოცნებამ“ 9 სექტემბერს პარტიის ცენტრალურ ოფისში გამართულ პრესკონფერენციაზე განაცხადა, რომ 2018 წლის საპრეზიდენტო არჩევნებში მხარს დამოუკიდბელ კანდიდატს სალომე ზურაბიშვილს დაუჭერს.

2018 წლის საპრეზიდენტო არჩევნები, 28 ოქტომბერს გაიმართება.

[ლუბა გიორგაძე, სამცხე–ჯავახეთი]