ანსამბლ 'მესხეთის' წევრები ჰოლანდიაში სოლო კონცერტებს მართავენ [Video]

ჯგუფს ჰოლანდიელი, ქართული ხალხური მუსიკით დაინტერესებული, იოკე ვან დერ ვეიდი მასპინძლობს.

"იოკე, რომელმაც იცის ქართული ხალხური სიმღერები და თან ამ სიმღერებს ასწავლის იქ ჰოლანდიელებს, ჩვენთან სტუმრად ხშირად ჩამოდის. აქ ვიკრიბებით და ერთად ვმღერით–ხოლმე", – ამბობს ანსამბლ "მესხეთის" ხელმძღვანელი ზაზა თამარაშვილი.

კვარტეტი, რომლის წევრებიც არიან: დავით ტაბატაძე, ზურაბ ინასარიძე, არჩილ კაპანაძე და ვასილ ბეგიშვილი, ჰოლანდიაში პირველ ოქტომბერს გაემგზავრა. აქ ისინი ფოლკლორულ სიმღერებს, საგალობლებს, ასევე ქართველი კომპოზიტორების კომპოზიციებს შეასრულებენ.

"სიმღერები ძირითადად ჩვენი რეპერტუარიდან იქნება, თუმცა კვარტეტმა ამ მოგზაურობისათვის სხვადასხვა სიმღერებიც შეარჩია",– ამბობს თამარაშვილი.

მისივე თქმით, ანსამბლ "მესხეთის" წევრები ჰოლანდიაში, ამსტერდამში მიმდინარე წლის მარტშიც იმყოფებოდნენ: "მაშინ, შვიდი კაცი ვიყავით. ჰოლანდიის საზოგადოებრივ არხზე გადის რეალითი შოუ "ვინ არის თხუნელა". ეს შოუ ამჯერად გადაიღეს საქართველოშიც, ვარძიაში და ჩვენთან ახალციხეში. აი, სწორედ ამის შემდეგ მიგვიწვიეს მისმა მონაწილეებმა ჰოლანდიაში".

ანსამბლი "მესხეთი" ახალციხეში 1949 წლიდან არსებობს.


ექსპრონტად შესრულებული სიმღერა ჰოლანდიაში, ქალაქ ჰოფდორფში:



[მარიამ ბარძიმაძე, ახალციხე]