საბიუჯეტო ორგანიზაციების წარმომადგენლები ახალციხეში ზურაბიშვილთან შეხვედრაზე [Video]

დამოუკიდებელმა პრეზიდენტობის კანდიდატმა სალომე ზურაბიშვილმა, რომელსაც მმართველი პარტია „ქართული ოცნება“ უჭერს მხარს დღეს, სამ ოქტომბერს ახალციხეში ამომრჩევლებთან შეხვედრა გამართა.

მესხეთის თეატრში შეხვედრაზე იყო ახალციხის მერიის ეკონომიკის სამსახურის უფროსი ილია ზარდიაშვილი, რომელმაც „სამხრეთის კარიბჭეს“ განუცხადა, რომ ერთი დღით შვებულებაშია: „მანქანა მყავდა გასაკეთებელი და შეხვედრაზე მისვლაც შევუთავსე ჩემს საქმეს“.



როგორც თავად ამბობს, ერთდღიანი შვებულებით ისარგებლა, მერის წარმომადგენელმა ქალაქ ახალციხეში ნუგზარ თამარაშვილმაც. დღეს იგი ზურაბიშვილის მიერ გამართულ წინასაარჩევნო შეხვედრას ესწრებოდა: „ერთი დღით გავედი შვებულებაში და ხვალ ისევ სამსახურში დავბრუნდები, ან შეიძლება რამდენიმე დღეც გავიგრძელო, ჯერ არ ვიცი“.



ზურაბიშვილთან გამართულ შეხვედრას ესწრებოდნენ საბიუჯეტო ორგანიზაციების თანამშრომლები არა მხოლოდ ახალციხიდან, არამედ ქალაქ ვალიდან და სოფლებიდანაც. ვინ უზრუნველყო ახალციხეში მათი ჩამოყვანა, ამაზე საჯაროდ საუბარი არ ისურვეს, პირად საუბრებში კი გვითხრეს რომ „შეხვედრაზე „ოცნების“ წევრებმა ჩამოიყვანეს“.



სოფლებიდან მოსახლეობის ტრანსპორტირების ორგანიზებას უარყოფენ „ქართულ ოცნებაში“.

„თქვენ რაღაც არასწორად გითხრეს. ორგანიზება ჩვენ არ გაგვიკეთებია, თვითონ ნახეს ავტობუსები და წარმოვიდნენ“, – ამბობს ფრაქცია „ქართული ოცნების“ თავმჯდომარე გიორგი გვარამაძე.



შეგახსენებთ, რომ სალომე ზურაბიშვილი სამცხე–ჯავახეთში მოსახლეობასთან შეხვედრებს მართავს. იგი უკვე შეხვდა ახალქალაქის, ნინოწმინდის, ასპინძის, ახალციხისა და ადიგენის მოსახლეობას. დღესვე შეხვდება ზურაბიშვილი ამომრჩევლებს ბორჯომშიც.

[ლუბა გიორგაძე, ნანა ინასარიძე – ახალციხე]