ახალციხეში იუსტიციის სახლში მეწარმეების რიგია

იუსტიციის სამინისტროს განცხადებით, ყველა ის პირი, ვინც ახორციელებს „შრომის უსაფრთხოების შესახებ“ საქართველოს მთავრობის დადგენილებით განსაზღვრულ მომეტებული საფრთხის შემცველ მძიმე, მავნე და საშიშპირობებიან სამუშაოებს, ვალდებულია შესაბამისი საქმიანობა ეკონომიკურ საქმიანობათა რეესტრში დღის ბოლომდე დაარეგისტრიროს.

მეწარმეების ნაწილი აცხადებს, რომ მათ ამის შესახებ ინფორმაცია არ ჰქონდათ და დღეს შემთხვევით გაიგეს. ნაწილი კი ამბობს, რომ იცოდნენ, თუმცა იუსტიციის სახლში აქამდე მოსვლა ვერ მოახერხეს.

„დღეს შუადღით შემთხვევით გავიგე, ჩემს მეუღლეს უთხრეს, მაშინვე მოვედი. აქამდე ინფორმაცია არ მქონდა“, – ამბობს შპს „ლაბა პროდუქტის“ დამფუძნებელი.

„ვიცოდი, შემოსავლების სამსახურის გვერდზე ვნახე უბრალოდ ვერ მოვიცალე, ახლა რიგში დგომა მომიწევს“, – გვითხრა ერთ–ერთმა მეწარმემ.

იუსტიციის სამინისტროს ინფორმაციით, ყველა მეწარმე წინასწარ იყო გაფრთხილებული აღნიშნული ცვლილების შესახებ: „ჯანდაცვის სამინისტრომ ყველა მომხმარებელს გაუგზავნა ინფორმაცია“.

იუსტიციის სამინისტროს გადაწყვეტილებით იუსტიციის სახლები მომხმარებელს 22:00 საათამდე მოემსახურებიან.

ახალციხის ისუტიციის სახლთან მგომი მეწარმეების რაოდენობა იმატებს, როგორც აქ მყოფები ამბობენ, მათ ვისაც ინფრომაცია ამ დრომდე არ აქვთ, ურეკავენ და მოსვლას ურჩევენ.





თბილისის იუსტიციის სახლში დღეს უპრეცედენტო რიგი იყო, ასობით კომპანიის წარმომადგენელი მთელი დღის განმავლობაში ცდილობა ე.წ. "მომეტებული საფრთხის შემცველ, მძიმე, მავნე და საშიშპირობებიანი" ორგანიზაციების რეესტრში ჩაწერას, რასაც მათ ახალი კანონმდებლობა ავალდებულებს.

[თინათინ ზაზაძე, ახალციხე]