ვალეში შუქნიშნების დაყენებას სამი თვის წინ ითხოვდნენ, თუმცა ამ დრომდე არ გაუკეთებიათ

„უახლოეს პერიოდში დამონტაჟდება შუქნიშანიც და ვიდეოკამერაც. რაც შეეხება ავტოსაგზაო ნიშნების დაყენების საკითხს ეგ ჯერ შესასწავლი გვაქვს და მიმდინარეობს მაგაზე მუშაობაც“, – გვითხრეს ახალციხის მერიის საზოგადოებასთან ურთიერთობის სამსახურში.

ვალეში ახალგაზრდები სტალინის ქუჩაზე „მწოლიარე პოლიციელისა“ და ავტოსაგზაო ნიშნების დაყენებას მიმდინარე წლის ივნისში ითხოვდნენ. მათი თქმით, იმ ადგილზე, სადაც სიჩქარის შემზღუდველი ნიშნები უნდა მოეწყოს, ავარიები ხშირად ხდება, ამიტომ ამ საკითხზე დროული რეაგირება არაერთი ადამიანის სიცოცხლეს გადაარჩენს.

ახალგაზრდების აქციას ვალეში ავარია უსწრებდა. 7 ივნისს სტალინის ქუჩაზე ავტოსაგზაო შემთხვევის შედეგად ოთხი წლის ბავშვი გარდაიცვალა.

[თორნიკე ზაზაძე, ახალციხე]