ახალციხეში ორ ისეთ ქუჩას მოაასფალტებენ, სადაც ჯერ კანალიზაციის ქსელი არ გაუკეთებიათ

ხაჩიკ სავოიანი ბაღინაშვილის ქუჩაზე ცხოვრობს და ამბობს, რომ ამ უბანში არც კანალიზაცია და არც ასფალტი არასდროს გაკეთებულა: „კარგია გზას რომ გვიგებენ, მაგრამ კანალიზაციაა არაა და ისე როგორ უნდა დააგონ, რომ ჯერ ქსელი არ გააკეთონ?! კანალიზაციის ცენტრალური მილი ძალიან ახლოსაა ჩვენ დასახლებასთან და ამიტომ 100 მეტრ სიგრეზეც კიარ მოუწევთ მილის ჩადება. ბევრჯერ მივმართეთ წყალკანალს და სულ ამბობენ გავაკეთებთო. ასფალტი თუ დააგეს მერე როგორღა გააკეთებენ, იმას აყრიან?!“

ახალციხის მუნიციპალიტეტის მერიაში ამბობენ, რომ ასფალტს იქამდე არ დააგებენ, ვოდრე საქართველოს გაერთიანებული წყალმომარაგების კომპანია საკანალიზაციო მილს არ გაიყვანს: „წყალმომარაგების კომპანიასთან ერთად შეთანხმება გვაქვს. აქ ჯერ კანალიზაციაც გაკეთდება და მერე გზა“.

საქართველოს გაერთიანებული წყალმომარაგების კომპანიის სამცხე–ჯავახეთის ფილიალის მენეჯერი ბესო ფილაური კი გვეუბნება, რომ ახალციხეში ცალკეულ ქუჩებზე კანალიზაციის გაკეთებას არ გეგმავენ, რადგან კომპანიას სურს, რომ ახალციხეში ყველა ქუჩაზე მოსაწყობი საკანალიზაციო ქსელი ერთ პროექტში მოაქციოს: „გადაწყვეტილი გვქონდა, რომ ბაღინაშვილის ქუჩას გავაკეთებდით, მაგრამ აღმოჩნდა რომ ახალციხეში არის ღია არხები და ამორტიზებულია ქსელიც. ამიტომ კომპანიან გადაწყვიტა, რომ გააკეთოს საერთო გეგმა, ახალციხის საერთო პროექტი. ცალ–ცალკე ქუჩებზე კანალიზაციას ვერ გავაკეთებთ“.

მისივე თქმით, საერთო პროექტისთვის ჯერ სატენდერო დოკუმენტებიც კი არაა შედგენილი: „2018 წლის ბოლომდე შევჯერდებით ყველაფერზე და ტენდერსაც გამოვაცხადებთ“.

ახალციხის მუნიციპალიტეტის მერიის მიერ ბაღინაშვილისა და სამსონიძის ქუჩების რეაბილიტაციისთვის გამოცხადებულ ტენდერში განაცხადების მიღების ბოლო ვადა 25 სექტემბერია. სამუშაობის შესყიდვის სავარაუდო ღირებულება 566 293 ლარს შეადგენს.

[მარიამ ბარძიმაძე, ახალციხე]