ბესიკ ამირანაშვილი: ‘ყველა მუნიციპალიტეტს შემოვივლი და პრობლემებს ადგილზე გავეცნობი’

ბესიკ ამირანაშვილის პირველი სამუშაო დღე სამცხე–ჯავახეთის გუბერნატორის პოსტზე გაცნობითი ხასიათის იყო. გუბერნატორის განმარტებით, ამ ეტაპზე სამხარეო ადმინისტრაციაში საკადრო ცვლილებებს არ გეგმავს , მთავარი გამოწვევა რეგიონში ეკონომიკური პრობლემებია.

„ჩემი მიზანია თითოეულ თანამშრომელს კარგად გავეცნო, გავიგო მათი პოტენციალი და მერე მივიღებ გადაწყვეტილებას როგორ მოვიქცე. ჩემს პოტენციალს მაქსიმალურად გამოვიყენებ. პრემიერის დავალებაა რომ ხალხთან აქტიური კომუნიკაცია მქონდეს. ყველა მუნიციპალიტეტში ჩვენ ერთად გადავჭრით პრობლემებს“.

რეგიონების სამსახურის უფროსმა სოზარ სუბარმა ადგილობრივი თვითმმართველობის წარმომადგენლებთან და მაჟორიტარ დეპუტატებთან ბესიკ ამირანაშვილის გამოცდილებაზე ისაუბრა.

„ძალიან ბევრი კითხვებია, რატომ გადმოგვყვავს ძალოვანი უწყებიდან, ეს მიდგომა არ მიმაჩნია სწორად, ერთი სამშობლო გვაქვს, ერთი საქმე გვაქვს და სადაც საჭიროა იქ უნდა ვემსახუროთ. სწორედ ამის მაგალითია ბესიკ ამირანაშვილი, ადამიანი რომელსაც აქვს საზოგადოებასთან ურთიერთობის უნარი და 24-საათიანი მუშაობის გამოცდილება.შერჩევამდე ბევრგან ვიკითხე მისი საქმიანობა და ერთი რამ ვერ ვუპოვე, რაც მას ჩრდილს მიაყენებდა“,– განაცხადა სოზარ სუბარმა.

დღევანდელ შეხვედრაზე სოზარ სუბარმა მიმდინარე და დადეგმილ ინფრასტრუქტურულ პროექტების მნიშვნელობაზეც ისაუბრა. მისი თქმით, სამცხე-ჯავახეთი ძალიან მნიშვნელოვანი კუთხეა. გარდა ისტორიული ღირსშესანიშნაობებისა, სოფლის მეურნეობისა და სატრანზიტო გადაზიდვების მიმართულებით განვითარების უზარმაზარი პოტენციალი აქვს, რომლის 10%-იც არ არის ათვისებული.

„კარგად არის განვითარებული ბორჯომი და ბაკურიანი, თუმცა არის მთელი რიგი მუნიციპალიტეტები, სადაც ეს პოტენციალი არ არის გამოყენებული. სწორედ ამიტომ, ხორციელდება ინფრასტრუქტურული პროექტები, რომელიც ამ პოტენციალის სრულად ათვისების შესაძლებლობას მოგვცემს.მუნიციპალიტეტი თუ საკუთარ თავშია ჩაკეტილი, ეს ქვეყნის განვითარებაზე ვერ აისახება კარგად, სწორედ გუბერნატორმა უნდა უზრუნველყოს თითოეული მუნიციპალიტეტის თანაბარი გაერთიანება“, –ამბობს სოზარ სუბარი.

მისი თქმით, ტურიზმის განვითარების კუთხით მნიშვნელოვანია ახალციხე-ზარზმა-ბათუმის და არის ბაკურიანი-ტაბაწყური-ახალციხის დამაკავშირებელი გზების რეაბილიტაცია: „წელს, აბასთუმანი სავსეა ტურისტებით და ძალიან მალე ის გახდება ერთ-ერთი საყვარელი ადგილი, არა მხოლოდ ჩვენი მოქალაქეებისთვის, არამედ უცხოელი ტურისტებისთვისაც. მთელი ამ პოტენციალის ათვისება მოგვცემს საშუალებას, რომ სამცხე-ჯავახეთი უმდიდრესი მხარე გახდეს“.

[ლუბა გიორგაძე, ახალციხე]