15 000–მდე ბავშვს სისხლში ტყვიის შემცველობაზე გამოიკვლევენ

კვლევა დაავადებათა კონტროლის ეროვნულ ცენტრთან ერთად ჩატარდება და როგორც გაეროს ბავშვთა ფონდის ჯანდაცვის პროგრამების ხელმძღვანელი თამარ უგულავა ამბობს, ამისთვის ჯერ შემთხვევითი შერჩევის პრინციპით 14 000 ოჯახი გამოიკითხება.

"სექტემბრიდან ვიწყებთ მრავალინდიკატორულ კლასტერულ კვლევას, რომელიც ოჯახის ირგვლივ 200 სხვადასხვა ფაქტორს შეისწავლის - დედასთან, მამასთან, ბავშვთან, მათ ქცევასთან, მთლიანად მათ საცხოვრებელ გარემოსთან დაკავშირებულ ფაქტორებს. ამას დაემატა სისხლში ტყვიის შემცველობის განსაზღვრის ტესტიც.

ბოლო დროს დაგროვილმა ინფორმაციებმა შექმნა იმის საფუძველი, რომ დაავადებათა კონტროლის ცენტრმა ამ თემის შესწავლა გადაწყვიტა და მთავრობამ მოგვმართა თხოვნით, რომ ამ ფართომასშტაბიან კვლევაში ასევე მომხდარიყო ბავშვების ტყვიაზე ტესტირებაც“, – ამბობს თამარ უგულავა და ამატებს, რომ კვლევაში ჩართული იქნებიან 2-დან 10 წლამდე ბავშვები – „ვვარაუდობთ, რომ მათი რაოდენობა 1500-მდე იქნება. თითო ოჯახში მკვლევარების სტუმრობა, დაახლოებით, 2 საათამდე გაგრძელდება, რადგან მათ დასჭირდებათ ყველა ფაქტორის ცალ-ცალკე შესწავლა, იქნება ეს დედის რეპროდუქციული ჯანმრთელობა, ბავშვის ჯანმრთელობა, მათი ქცევა და ა.შ.“

მისივე თქმით, კითხვარის შევსების გარდა, 5 წლამდე ასაკის ბავშვებს აწონიან და სიმაღლეში გაზომავენ: „ამის მიხედვით ჩვენ შეგვეძლება ვთქვათ, აქვთ თუ არა მათ ნუტრიციული დეფიციტი. მიკროელემენტების დეფიციტმა შესაძლოა მათ წონასა და სიმაღლეში გარკვეული ცვლილებები მოგვცეს. თუ დადგინდა სისხლში ტყვიის მომატებული შემცველობა, მაშინ იწყება ფიქრი იმაზე, რა არის ამის წყარო. ამის დადგენისთვის არსებობს ატომურ-იზოტოპური მეთოდი, რომელიც მინიშნებას გვაძლევს, საიდან არის ეს ტყვია. მაგალითად, ბენზინიდან, საღებავიდან და ა.შ.“

[sknews.ge]