უცხო ენის გამოცდაზე 13 აბიტურიენტი არ გამოცხადდა

ახალციხის საგამოცდო ცენტრის მონაცემებით ინგლისურ ენაში, პირველ სესიაზე რეგისტრირებული 126 აპლიკანტიდან – 2 , ხოლო რუსულ ენაში რეგისტრირებული 115 აბიტურიენტიდან – 11 არ გამოცხადდა.

უცხო ენების 90–ქულიანი ტესტისთვის 2 საათი და 40 წუთი იყო გათვალისწინებული, თუმცა აბიტურიენტების უმრავლესობამ წერა დროზე ადრე დაასრულა, მათ საგამოცდო ცენტრი დაახლოებით საათსა და 25 წუთში დატოვეს.

გამოცდიდან გამოსული აბიტურიენტები აცხადებენ, რომ ტესტი მარტივი იყო, ნაწილი კი ამბობს, რომ ტესტის ბოლოს მოცემული თემა არ დაუწერია.

ახალციხის საგამოცდო ცენტრის ხელმძღვანელი გელა ინასარიძე ამბობს, რომ საგამოცდო პროცესმა მშვიდ ვითარებაში ჩაიარა.

მეორე სესიისთვის რეგისტრაცია ამ წუთებში მიმდინარეობს.

ერთიან ეროვნულ გამოცდებს ხვალ, 10 ივლისს აბიტურიენტები ისევ უცხო ენაში ჩააბარებენ.

[თორნიკე ზაზაძე, ახალციხე]