მდინარის დაბინძურების გამო ახალციხის სასაკლაოს დააჯარიმებენ

გარემოსდაცვითი ზედამხედველობის დეპარტამენტმა მდინარე ფოცხოვიდან აღებულ სინჯებზე ლაბორატორიული კვლევის პასუხები დღეს, 13 სექტემბერს მიიღო. მონაცემების დამუშავებამდე ირკვევა, რომ საწარმო მდინარე ფოცხოვს აბინძურებს, გარდა ამისა, უკანონოდ მოიპოვებს წყალსაც.

„დასკვნა შესასწავლია, რადგან ჩატარდა როგორც მიკრო–ბიოლოგიური ექსპერტიზა, ასევე ქიმიური ლაბორატორიული კვლევა. ამიტომ დაახლოებით 50–მდე პარამეტრია გადასამოწმებელი და დასაანგარიშებელი იმის დასათვლელად, თუ რა ოდენობის დაბინძურებული წყალი ჩაუშვა მდინარეში“, – ამბობს გარემოსდაცვითი ზედამხედველობის დეპარტამენტის სამცხე–ჯავახეთის რეგიონული სამმართველოს გარემოსდაცვითი ინსპექტირების განყოფილების ინსპექტორი პაატა პარუნაშვილი.

მისი თქმით, მაგალითად, კვლევის პასუხის მიხედვით გადაჭარბებულია შეწონილი ნაწილაკების ოდენობა: „ამის გამო რამდენი ტონა დაბინძურებული წყალიც ჩაუშვეს მდინარეში, იმდენი 100 ლარი დაეწერებათ ჯარიმა“.

როგორც გარემოსდაცვითი ზედამხედველობის დეპარტამენტში აცხადებენ, ყველა პარამეტრის მიხედვით დაანგარიშდება საბოლოოდ გარემოზე მიყენებული ზიანის ოდენობა და ჯარიმა ამის მიხედვით განისაზღვრება.

გარდა მდინარის დაბინძურებისა, „ახალციხე–აგროფუდს“ წყლის უკანონოდ მოპოვების გამოც დააჯარიმებენ.

„ადმინისტრაციული სამართალდარღვევის ოქმი შედგება, რომლის მიხედვითაც კომპანია ორი მუხლით დაჯარიმდება. ოქმი სასამართლოს გადაეგზავნება, ამის შემდეგ კი კომპანიას წერილობით მივმარათავთ და გონივრულ დროს მივცემთ ამ დარღვევების აღმოსაფხვრელად“, – ამბობს პაატა პარუნაშვილი და ამატებს, რომ ამ ვადის ამოწურვის შემდეგ კომპანიას ხელახლა შეამოწმებენ და თუ სამჯერ გადამოწმების შედეგად კომპანია არ აღმოფხვრის დარღვევებს, მისი ფუნქციონირების შეწყვეტის საკითხი დადგება, – „თუმცა ასეთი რამ ჩვენ პრაქტიკაში თითქმის არასდროს ხდება. კომპანიები ცდილობენ ყოველთვის რომ პრობლემები არ შექმნან“.

პარუნაშვილის თქმით, კომპანიამ წყლის მოპოვებაზე ნებართვა უნდა მიიღოს, მდინარეში წყლის ჩაშვებისთვის კი ზღვრულად ჩასაშვები ოდენობა უნდა განესაღვროს.

შეგახსენებთ, რომ გარემოსდაცვით ზედამხედველობის დეპარტამენტმა „ახალციხე– აგროფუდის“ მიერ მდინარეის დაბინძურების შესაძლო ფააქტის შესწავლა „სამხრეთის კარიბჭიდან“ შესული ინფორმაციის საფუძველზე დაიწყო. სასაკლაო მდინარე ფოცხოვში დაკლული ცხვრის სისხლს უშვებს.

[თამუნა უჩიძე, ახალციხე]