რას დაჰპირდა სამველ პეტროსიანი ვაჩიანელებს?

ეს განაცხადება ახალქალაქის მუნიციპალიტეტის მაჟორიტარმა დეპუტატმა სამველ პეტროსიანმა ვაჩიანის მცხოვრებლებთან შეხვედრისას გააკეტეთა. ადამიანის უფლებათა დაცვის კომიტეტის წევრმა სამველ პეტროსიანმა ახალქალაქის მუნიციპალიტეტის მცხოვრებლებს შვიდი თვის მუშაობის ანგარიში წარუდგინა და მათი პრობლემები მოისმინა.

პეტროსიანმა წინასაარჩევნო პერიოდის დაპირებები გაიხსენა. მათ შორის, ორი უმნიშვნელოვანესი საკითხი: სომეხთა გენოციდისა და სომხური ენის სტატუსის აღიარება.

"სომხური ენის საკითხი კომიტეტის სხდომებზე წარვადგინე, ის კვლავ გადაუჭრელია, მაგრამ გარდა იმისა, რომ საკითხი ოფიციალური გზით არის წარდგენილი, კულუარებში ვესაუბრე თითქმის ყველა დეპუტატს, უნდა შევძლოთ ევროპული ქარტიის რატიფიცირება. თუ რატიფიცირება მოხდება, ჯავახეთში ძირითადი პრობლემატური საკითხები გადაწყდება", - განაცხადა პეტროსიანმა.

მისივე თქმით, იგი გენოციდის საკითხზეც მუშაობს. პარლამენტში ეს საკითხიც წერილობითი ფორმით შეიტანა. გარდა ამისა, გენოციდის აღიარების თხოვნით წერილებია გაგზავნილი საქართველოში მოქმედ ყველა საელჩოში.

ვაჩიანის მცხოვრებლებმა დეპუტატთან შეხვედრისას სოფლის გაზიფიცირება მოითხოვეს. მათ ისაუბრეს მშობიარობის სიძვირეზეც. გარდა ამისა, ადგილობრივებმა აღნიშნეს, რომ მათ შეშფოთებას იწვევს ვაჩიანის ტბა, რომელიც დღითიდღე შრება.

სოფლის მოსახლეობამ განათლების პრობლემებზეც ისაუბრა. მათი თქმით, საჭიროა სკოლებში კადრების კვალიფიკაციას მიექცეს ყურადღება. გარდა ამისა, ადგილობრივებმა ქართულ-სომხური უნივერსიტეტის საკითხიც წამოწიეს: ”აუცილებელია, რომ ახალქალაქში გაიხსნას ქართულ-სომხური უნივერსიტეტი, რათა კურსდამთავრებულმა ადგილზე მიიღოს უმაღლესი განათლება და შეძლოს მუშაობა”.

”დეპუტატი არის შუამავალი რგოლი ხალხსა და ხელისუფლებას შორის”, - ამ სიტყვებით, სამველ პეტროსიანი ვაჩიანელებს პრობლემების მოგვარებისთვის კომპეტენტურ უწყებებთან შუამდგომლობას დაჰპირდა და დასძინა, რომ მსგავსი შეხვდრები სისტემატური უნდა გახდეს: ”ხალხთან კავშირი სწორედ ასეთი შეხვედრებია. არ მინდა მსაყვედურობდნენ, რომ ოთხ წელიწადში მხოლოდ ერთხელ მივდივარ ხალხთან”.



[აღუნიკ აივაზიანი, ახალქალაქი]