ახალციხის ციხის ციტადელზე ხალიჩა–ფარდაგების გამოფენა მოეწყო

ქართლ–კახეთიდან, ფშავ–ხევსურეთიდან, თუშეთიდან, აჭარიდან, თბილისიდან და სამცხე–ჯავახეთიდან წარმოდგენილი ხალიჩა–ფარდაგების ნახვა დამთვალიერებლებს მთლი ზაფხულის განმავლობაში შეეძლებათ.

როგორც სამცხე–ჯავახეთის ისტორიული მუზეუმის დარბაზის ზედამხედველი დალი გოგოლაძე ამბობს, წარმოდგენილი ნიმუშები ძირითადად იმ რეგიონებიდანაა, სადაც მეცხვარეობა იყო განვითარებული: „თუშური ფარდაგები მშვიდი ფერებით ხასიათდება და რაც მთავარია, ბუნებრივი ფერით იქსოვება, რასაც დიდი მნიშვნელობა აქვს. მესხური ფარდაგები კი შედარებით ჭრელი და ფერადოვანია, ამის მიზეზი თურქული გავლენაა.“

ხალიჩა–ფარდაგებთან ერთად ციტადელზე ხევსურული ტანსაცმელი და ახალციხელი ქალის როზა მეფისაშვილის მიერ მე–19 საუკუნეში შესრულებული „თამარ მეფეც“ გამოფინეს.



„მე–19 საუკუნეში, ქალაქის ძველ უბანში ცხოვრობდა როზა მეფისაშვილი. მას განათლება არ მიუღია, თუმცა განსაკუთრებული ქსოვისა და ქარგვის ნიჭით, მთელ ახალციხეში ყველას იცნობდა“, – გვიყვება გოგოლაძე.

გამოფენა სამცხე–ჯავახეთის იტორიულ მუზეუმში უნდა გამართულიყო, თუმცა შენობაში დაგეგმილი სარემონტო სამუშაოების გამო ის ციხის ციტადელზე მოეწყო.

[ავთო ინასარიძე, ახალციხე]