‘გაიზომე წნევა’ – აქცია ახალციხეში

დღეს, ორ ივნისს , დილიდან „ახალციხის ციხეზე“ , დაავადებათა კონტროლისა და საზოგადოებრივი ჯანმრთელობის ეროვნული ცენტრის ორგანიზებით საინფორმაციო აქცია იმართება სახელწოდებით - „ჰიპერტენზიის მართვა შენს ხელშია; გაიზომე წნევა - იცოდე შენი წნევის ციფრები“.

„ჩვენი მიზანია, ჰიპერტენზიის, ანუ მომატებული არტერიული წნევის შესახებ საზოგადოებას ინფორმაცია მივაწოდოთ. ასევე, გვინდა ავუხსnათ ხალხს, რომ ჰიპერტენზია არის ქრონიკული დაავადება, ის არ იკურნება, თუმცა კონტროლის შემთხვევაში მისი ეფექტური მკურნალობა მაინც შესაძლებელია“, – ამბობს დაავადებათა კონტროლისა და საზოგადოებრივი ჯანმრთელობის ეროვნული ცენტრის არაგადამდებ დაავადებათა დეპარტამენტის მთავარი სპეციალისტი და საქართველოს ჰიპერტონიის შემსწავლელი საზოგადოების კვლევის ხელმძღვანელი დალი ტრაპაიძე.

მისი თქმით, არტერიული ჰიპერტენზიის შემთხვევაში ექიმის ყურადღების ქვეშ ყოფნა აუცილებელია: „მხოლოდ ექიმის დანიშნული პრეპარატის მიღება შეიძლება და მხოლოდ ექიმის კონსულტაციით უნდა შიცვალოს წამლის დოზა“.

ტრაპაიძე მათ ვისაც შესაძლოა არ აწუხებთ წნევა, მაგრამ არიან ალკოჰოლდამოკიდებულები, ეწევიან თამბაქოს, აქვთ ჭარბი წონა, ან ჰიპერტენზია მოყვებათ მომკვიდრეობით, მოუწოდებს, რომ ექიმთან წნევა პერიოდულად გაიკონტროლონ: „თუ არ აწუხებთ არაფერი, ეს იმას არ ნიშნავს, რომ კარგად არიან, ასეთი ადამიანები დიდი რისკის ქვეშ არიან“.

ამ ღონისძებით საქართველო უკვე მეორედ შეუერთდა მსოფლიო მასშტაბით მიმდინარე აქციას – „მაისის გაზომვების თვეს“.

არტერიული ჰიპერტენზია ქრონიკული მდგომარეობაა. იგი სიკვდილობის ძირითად და ინვალიდობის მესამე უმთავრეს მიზეზს წარმოადგენს მსოფლიოში.

ჯანმრთელობის მსოფლიო ორგანიზაციის მონაცემებით, მსოფლიოში ხუთიდან ორ ზრდასრულ ადამიანს მაღალი წნევა აქვს. მომატებულ არტერიულ წნევას ყოველწლიურად 7,5 მილიონი სიკვდილი უკავშირდება. დაბალი და საშუალო შემოსავლის ქვეყნებში, მომატებული არტერიული წნევის გავრცელების მაჩვენებლი 40%-ს აღწევს.

საქართველოში კარდიო-ვასკულურ დაავადებათა ზოგად სტრუქტურაში ჰიპერტენზიული ავადმყოფობის წილი 60%-მდეა.



[თამუნა უჩიძე, ახალციხე]