საქართველოში არაგადამდები დაავადებებისა და მათი რისკ-ფაქტორების მეორე კვლევა იწყება

დაავადებათა კონტროლის ცენტრის ინფორმაციით, STEPS კვლევის ჩატარება ჯანმო-ს ტექნიკური და ფინანსური დახმარებით და დაავადებათა კონტროლისა და საზოგადოებრივი ჯანმრთელობის ეროვნული ცენტრის თანადაფინანსებით იწყება.

არაგადამდები დაავადებები

არაგადამდები დაავადებებია გულ-სისხლძარღვთა დაავადებები, კიბო, ფილტვის ქრონიკული დაავადებები, დიაბეტი, ტრავმა.

„არაგადამდები დაავადებები 21-ე საუკუნის გლობალური ჯანმრთლეობის უმნიშვნელოვანესი გამოწვევააა, ამ დაავადებებით გამოწვეული სიკვდილიანობა და ავადობის ტვირთის მზარდი ტენდენცია წარმოადგენს ქვეყნების სოციალურ-ეკონომიკური განვითარების მთავარ ბარიერს, მათ შორის საქართველოსთვისაც“, – ამბობენ დაავადებთა კონტროლის ცენტრში.

მათი ინფორმაციით, არაგადამდებ დაავადებათა ეპიდზედამხედველობა ერთერთი აპრობირებული მეთოდია.

STEPS კვლევა

არაგადამდებ დაავადებათა რისკ-ფაქტორების კვლევა ხორციელდება ჯანმო-ს სტანდარტული ინსტრუმენტის (STEPS მეთოდოლოგია) გამოყენებით. STEPS კვლევას ახორციელებს დაავადებათა კონტროლისა და საზოგადოებრივი ჯანმრთელობის ეროვნული ცენტრი მთელი საქართველოს მასშტაბით.

საქართველოში STEPS კვლევა პირველად 2010 წელს ჩატარდა. მეორე კვლევა დაგეგმილია ივლისის თვიდან.
დაავადებათა კონტროლის ცენტრის ინფორმაციით, ამ ეტაპზე შემთხვევითად შერჩეული 6000-მდე 18-69 წლის საქართველოს მოქალაქეს გამოიკვლევენ.

როგორ ხდება კვლევა

STEPS კვლევა სამ ეტაპიანია. პირველ ეტაპზე სოციო-დემოგრაფიულ მონაცემებთან ერთად ხდება ინფორმაციის შეგროვება ქცევით რისკ-ფაქტორებთან დაკავშირებით, როგორიცაა თამბაქო, ალკოჰოლი, არაჯანსაღი კვება, დაბალი ფიზიკური აქტივობა, და სხვ.

მეორე ეტაპზე ხდება ფიზიკური გაზომვების ჩატარება (სიმაღლე, წონა, წელისა და თეძოს გარშემოწერილობა, სისხლის წნევა, პულსი).

მესამე ეტაპზე ხდება ბიოლოგიური რისკ-ფაქტორების შესწავლა - ლაბორატორიული ანალიზის ჩატარება სწრაფი მარტივი ტესტების საშუალებით; კერძოდ, ვიკვლევთ სისხლში გლუკოზის, ქოლესტეროლის და შარდში მარილის, კრეტინინისა და კოტინინის მაჩვენებლებს.

ყველა ეს პროცედურა მოსახლეობისათვის უფასოა.

მიმართვა მოსახლეობას

დაავადებათა კონტროლის ეროვნული ცენტრი მოსახლეობას თხოვნით მიმართავს მაქსიმალურად შეუწყონ ხელი დაავადებათა კონტროლისა და საზოგადოებრივი ჯანმრთელობის ეროვნული ცენტრის წარმომადგენლებს კვლევის განხორციელებაში.

„მათი ჩართულობით გვექნება ფასეული მტკიცებულებები არაგადამდები დაავადებებისა და მათი ქცევითი და ბიოლოგიური რისკ-ფაქტორების გავრცელების შესახებ დინამიკაში, რაც მნიშვნელოვანი წინაპირობაა საზოგადოებრივ ჯანდაცვითი გადაწყვეტილებებისა და ინტერვენციების მოსამზადებლად. ეს უკანასკნელნი კი მნიშვნელოვნად შეუწყობს ხელს მოსახლეობის ჯანმრთელობის გაუმჯობესებას“, – აცხადებენ დაავადებათა კონტროლის ცენტრში.

[ნინო ნარიმანიშვილი, ახალციხე]