ანდეზიტში გზის გასაკეთებლად ტექნიკა მიიყვანეს

აქციის მონაწილეებთან რამდენიმე წუთის წინ ბორჯომის მუნიციპალიტეტის მერი ლევან ლიპარტია მივიდა. მასთან ერთად სოფელში მძიმე ტექნიკაც გამოჩნდა.

„ჩვენი მოთხოვნა შესრულდა. ამიტომ პროტესტს ვწყვეტთ და ვიშლებით. მერმა გვითხრა, რომ ტექნიკა დროულად დაიწყებს მუშაობას“, – ამბობს აქციის მონაწილე ვახტანგ ბიჩინაშვილი.

„არ მცალია და ვერ დაგელაპარაკებით“, – გვითხრა სატელეფონო საუბარში ბორჯომის მუნიციპალიტეტის მერმა ლევან ლიპარტიამ.

შეგახსენებთ, რომ ანდეზიტისა და ციხისჯვრის მოსახლეობა გზის რეაბილიტაციის მოთხოვნით აქციას 08:00 საათიდან მართავდა.

[ლუბა გიორგაძე, ბროჯომი]