კვირიკაშვილი: თანამდებობა არცერთი ადამიანის უბედურებად არ მიღირს

პრემიერ მინისტრი გიორგი კვირიკაშვილი ამბობს, რომ ნებისმიერ მომენტში დატოვებს თანამდებობას, თუ დარწმუნდება, რომ ეს გადაწყვეტილება ქვეყანას წაადგება ან სიტუაციას განმუხტავს, თუმცა მისივე თქმით, ეს მომენტი ახლა არაა.

პრემიერმა აღნიშნულის შესახებ, დღეს, პირველ ივნისს, გვიან ღამით მთავრობის კანცელარიაში გამართულ სპეციალურ ბრიფინგზე განაცხადა. მისი თქმით, ხორავას ქუჩის საქმეს შინაგან საქმეთა სამინისტრო დაიბრუნებს გამოსაძიებლად. ასევე, პრემიერმა ისაუბრა, პარლამენტში საგამოძიებო კომისიის შექმნის თაობაზე: "შოთაძემ გადადგა ღირსეული ნაბიჯი და არ დააყენა ეჭვქვეშ პროკურატურის რეპუტაცია. დავალება მივეცი იუსტიციის მინისტრს, რომ საზოგადოების მაქსიმალური ჩართულობით და მაქსიმალური ლეგიტიმაციით, ყველა ფრაქციის მონაწილეობით, სამოქალაქო სექტორის ჩართულობით შეირჩეს ახალი პროკურორი, რომ მისხალი ეჭვი არ არსებობდეს. მინდა გარანტია მივცე დაღუპული ბავშვების მშობლებს, გამოძიების ნებისმიერ ეტაპზე, როგორც მოისურვებენ მიიღებენ იმ ხარისხით ინფორმაციას, მაქსიმალური კომუნიკაცია", – აცხადებს კვირიკაშვილი.

კვირიკაშვილის ბრიფინგის საპასუხოდ აქციაზე სარალიძემ განაცხადა, რომ შინაგან საქმეთა სამინისტროს არ ენდობა და პრემიერ მინისტრის გადადგომას ითხოვს.

[sknews.ge]