ცხრა შვილიანი ოსტატის შედეგიანი შრომა - BP და მისი პარტნიორები სოფლისთვის [R]

საბჭოთა კავშირის დაშლის შემდეგ არახელსაყრელი ეკონომიკური პირობების გამო საბადოს დამუშავება შეჩერდა. გარდა იმისა, რომ სოფელში უხვად მოიპოვება სასარგებლო წიაღისეული, ნაოხრების გეოგრაფიული ადგილმდებარეობა ხელს უწყობს სოფლის მეურნეობის წარმოებას და მოსახლეობაც თანდათან გადაერთო სასოფლო-სამეურნეო საქმიანობაზე.

არასასოფლო-სამეურნეო წარმოება და მომსახურება შედარებით ნელი ტემპებით ვითარდებოდა და მოსახლეობას მსგავსი სერვისების მისაღებად მიმდებარე სოფლებში ან ქალაქში უწევდა წასვლა.

პეტროს მარქარიანი ერთ-ერთი პირველია, ვინც არასასოფლო სერვისის განვითარებაში ჩაერთო. მანქანების მიმართ ინტერესი ყოველთვის მაღალი ჰქონდა და როდესაც საზღვარგარეთიდან საბოლოოდ დაბრუნდა ნაოხრებში, გადაწყვიტა ავტომანქანების შეკეთებას მიჰყოლოდა.

ინტერვიუს ჩასაწერად სახლში ვესტუმრეთ ბატონ პეტროს, სადაც ახალგაზრდების სიმრავლე თვალში მოგვხვდა. ავტო სახელოსნოში მანქანა იდგა, რომელსაც პეტროსთან ერთად ახალგაზრდა ყმაწვილიც დასტრიალებდა თავს, ეზოში გოგონები ფუსფუსებდნენ, შედარებით პატარა ბავშვები კი სხვადასხვა თამაშებით იყვნენ გართულნი. როგორც აღმოჩნდა, თვითნასწავლი ხელოსანი ცხრა შვილის მამაა.

გამართულ ავტო სახელოსნომდე კი რთული გზა იყო, რომელიც პეტროსმა დიდი შემართებით განვლო. შესაბამისი პროფესიული სასწავლებლის არ არსებობის გამო გადაწყვიტა თავად შეესწავლა ხელობა. ღიმილით იხსენებს, რომ მამის მანქანაზე სწავლობდა მუშაობას და ხშირადაც უფუჭებდა მანქანას.

თვითნასწავლი ხელოსანი ავტომობილის პრობლემის დიაგნოსტირებას ადვილად ახდენდა, მაგრამ ხშირად საჭირო ინსტრუმენტების არ ქონის გამო შეკეთებას ვერ ახერხებდა და იძულებული იყო მომხმარებელი სხვა ხელოსანთან გაეშვა. მისი "დიაგნოზი" ყოველთვის მართლდებოდა და ამიტომ სოფელში მალე გაითქვა სახელი.

"ჩემი შვილების მხარდაჭერა ძალიან მნიშვნელოვანია. ჩემს გამოცდილებას მათ ვუზიარებ და ისინიც დიდი ინტერესითა და შემართებით მეხმარებიან ბიზნესის სწორედ წარმართვაში"

სამუშაოებს ასრულებდა სახლთან ახლოს, შესაბამისი შენობის გარეშე. ხშირად უწევდა მიწაზე დაწოლა, რომ ქვემოდან შეემოწმებინა და შეეკეთებინა მანქანა, რაც ცხადია ართულებდა მის საქმიანობას.

"ადგილობრივი მოსახლეობის განვითარების ინიციატივის" პროექტისა და კონკურსის შესახებ პეტროს მარქარიანმა "რეგიონული განვითარების ასოციაციის" მიერ ჩატარებულ სოფლის კრებაზე შეიტყო. დადებითი განწყობით შეხვდა წამოწყებას და გადაწყვიტა მონაწილეობა მიეღო. თუმცა ენის ბარიერი ართულებდა კონკურსში მონაწილეობას.

"მიუხედავად იმისა, რომ განაცხადი რუსულ ენაზე იყო, წერა მაინც მიჭირდა, ხშირად ვაკითხავდი "რეგიონული განვითარების ასოციაციის" ოფისს და ვთხოვდი დახმარებას".

პირველად მიიღო მსგავს პროექტში მონაწილეობა და გამარჯვების დიდი სურვილი ჰქონდა. თანამონაწილეობით უნდოდა შეეძინა ამწე და მისი მოლოდინი გამართლდა მაშინ, როდესაც საბოლოო დასტური მიიღო პროექტისგან.

საკუთარი თანამონაწილეობით ააშენა სახელოსნო, შეძენილი ამწეთი კი, გაზარდა შრომის ნაყოფიერება, რამაც შესაბამისად მომხმარებლის რაოდენობა მკვეთრად გაიზარდა.

ბიზნესის კუთხით დანახულმა საქმიანობამ, მომხმარებლების მოთხოვნებზე დაკვირვებისა და მათი შესწავლისკენ უბიძგა. სოფელში არსებული მანქანების მდგომარეობიდან გამომდინარე ხშირად იყო საჭირო შესადუღებელი სამუშაოების გაწევა. სწორედ ამ იდეით წარსდგა "ადგილობრივი მოსახლეობის განვითარების ინიციატივის" მიერ ხელმეორედ გამოცხადებულ კონკურსზე. მოიპოვა კიდევ ერთი თანადაფინანსება, რითაც შეიძინა შედუღების აპარატი და სხვა დანადგარები.

გაფართოების შემდეგ სახელოსნო გახდა სრულფასოვანი და ადგილობრივ მოსახლეობას აღარ უწევს სხვაგან წასვლა. კლიენტების რაოდენობა კიდე უფრო გაიზარდა და პეტროსის სახელოსნო ცნობილი გახდა მიმდებარე სოფლებსა და ქალაქში.

"სოფლის გარდა კლიენტები ახალციხიდან, რუსეთიდან და თურქეთიდანაც მყავს, საზღვართან ახლოს ვართ, ხშირად გადმოდიან მეზობელი ქვეყნებიდან ადამიანები და მათაც სჭირდებათ ავტო მომსახურება. ჩემივე კლიენტები მიგზავნიან კლიენტებს, იციან რომ მიიღებენ ხარისხიან მომსახურებას. ხანდახან იმდენი მომხმარებელი მყავს, რომ სახელოსნომდე მოსასვლელი გზა იკეტება მანქანების დიდი რაოდენობის გამო".

რეგიონული განვითარების ასოციაცია