'ვესაუბრებით ამომრჩევლებს' – საინფორმაციო კამპანია ახალციხეში

დღეს, 20 მაისს, საინფორმაციო კამპანიის "ვესაუბრებით ამომრჩევლებს" ფარგლებში, ახალციხის საარჩევნო ოლქის წარმომადგენლები მოსახლეობას საზოგადოებრივი თავშეყრის ადგილებში შეხვდნენ.

საარჩევნო უფლებების გაცნობასთან ერთად, მათ ადგილობრივებს ინფორმაცია საოლქო საარჩევნო კომისიების ფუნქცია–მოვალეობების შესახებაც მიაწოდეს. გარდა ამისა, ამომრჩევლებს საინფორმაციო ბარათები დაურიგდათ, 2018 წლის საპრეზიდენტო არჩევნებისა და საარჩევნო ადმინისტრაციის საქმიანობის შესახებ.

"ჩვენი მიზანია გაძლიერდეს კომუნიკაცია ამომრჩეველსა და საოლქო საარჩევნო კომისიებს შორის, გვინდა ამომრჩეველს ჰქონდეს ინფორმაცია იმის შესახებ, თუ რას აკეთებს საარჩევნო ადმინისტრაცია", – განმარტავს #37–ე ახალციხის სალქო საარჩევნო კომისიის თავმჯდომარე, თეა გავაშელი.

კამპანია "ვესაუბრებით ამომრჩევლებს" საარჩევნო ადმინისტრაციის ინიციატივაა და მთელი ქვეყნის მასშტაბით ხორციელდება. იგი რამდენიმე ეტაპს მოიცავს. გასვლითი შეხვედრების შემდეგ, დაგეგმილია საჯარო შეხვედრები უშუალოდ საოლქო საარჩევნო კომისიებში ამომრჩევლებთან და ჩართულ მხარეებთან. შეხვედრებზე მოქალაქეებს შესაძლებლობა ექნებათ მიიღონ ინფორმაცია არჩევნების ისტორიისა და პირველი საყოველთაო დემოკრატიული არჩევნების თაობაზე; ასევე საარჩევნო ადმინისტრაციის განვითარების, მიღწევებისა და ამომრჩევლებისთვის შეთავაზებული სერვისების შესახებ.









[თაკო ფეიქრიშვილი, ახალციხე]