როგორ აღნიშნეს ფაშიზმზე გამარჯვების დღე სამცხე–ჯავახეთში

ახალციხე

სამცხე–ჯავახეთში, მეორე მსოფლიო ომის მონაწილე, 44 ვეტერანია. მათგან ათი ახალციხეში ცხოვრობს, თერთმეტი ბორჯომში, ორი ასპინძაში, სამი ადიგენში, თოთხმეტი ახალქალაქში, ოთხი კი ნინოწმინდაში.

ფაშიზმზე გამარჯვეების დღე, 9 მაისი რეგიონის ექვსივე მუნიციალიტეტში მემორიალების შემკობით დაიწყო.
ახალციხეში 9 მაისის მემორიალთან მცირე ღონისძიება გაიმართა. თარიღთან დაკავშირებით, მუნიციპალიტეტში მცხოვრებ, ათ ვეტერანს, ადგილობრივი ბიუჯეტიდან, თანხა 400–400 ლარი გადაეცა.

ასპინძაში, ვეტერანების პატივსაცემად, ადგილობრივი ფოლკლორული ანსამბლების მონაწილეობით ღონისძიება გაიმართა. მუნიციპალიტეტის ხელმძღვანელმა პირებმა ყვავილებით შეამკეს ფაშიზმზე გამარჯვების მემორიალი. მუნიციპალიტეტში მცხოვრებ ორ ვეტერანს კი თანხა, 1 000 ლარის ოდენობით ჩაურიცხეს.

მეორე მსოფლიო ომის მემორიალები ყვავილებით შეამკეს, ასპინძის სოფლებშიც: ხიზაბავრაში, დამალასა და ნაქალაქევში.

ასპინძა

მემორიალის ყვავილებით შემკობის ცერემონია გაიმართა ადიგენშიც. ღონისძიებაზე ვეტერანები არ იმყოფებოდნენ. გამარჯვების დღის აღსანიშნავად, მუნიციპალიტეტში მცხოვრები სამი ვეტერანისთვის 300–300 ლარის ოდენობით თანხა გამოიყო.

ადიგენი

ბორჯომში, დაბა ახალდაბაში დღეს, შინმოუსვლელთა ახლადრეაბილიტირებული პარკი გაიხსნა. ბორჯომში მცხოვრებ თერთმეტ ვეტერანს კი საჩუქრად მერიისგან ფულადი თანხა 200 ლარის ოდენობით გადაეცათ.

ბორჯომი

ახალქალაქის მერია, მუნიციპალიტეტში მცხოვრებ 14 ომის ვეტერანს სადღესასწაულო სადილით გაუმასპინძლდა და ფულადი თანხა, თითოეულს 750 ლარის ოდენობით გადასცა.

ახალქალაქი

ასევე 500 ლარიანი ფულადი ჯილდო გადაეცათ ნინოწმინდის მუნიციპალიტეტში მცხოვრებ ოთხ ვეტერანს. გამარჯვების დღისადმი მიძღვნილი ღონისძიებები გაიმართა ნინოწმინდასა და მუნიციპალიტეტის 13 სოფელში.

ნინოწმინდა

სამცხე–ჯავახთის ყველა მუნიციპალიტეტში, 9 მაისისადმი მიძღვნილი ღონისძიებებისა და ფულადი ჯილდოებისათვის, ჯამში დაახლოებით 20 000 ლარზე მეტი დაიხარჯა.

[ლუბა გიორგაძე, ახალციხე]