წვიმამ განსაკუთრებით სამი ქუჩა დააზარალა

”ვინმემ ყურადღება მოგვაქციოს. პირველი სართული მთლიანად დაიტბორა. რამდენჯერ მივმართეთ ადგილობრივ ხელისუფლებას, მაგრამ მათი მხრიდან რეაგირება არ ყოფილა. ყოველი წვიმის შემდეგ ჩვენს ქუჩაზე ასეთი მდგომარეობაა. მოსაწესრიგებელია საკანალიზაციო სიტემა, ქუჩაზე ერთი მილი ჩადის და ისიც წვიმის დროს წყლის დიდ ნაკადs ვერ ატარებს”, -ამბობენ ათონელის ქუჩის მცხოვრებლები.

დახმარებას ითხოვენ გურამიშვილის ქუჩაზეც. აქ, ნიაღვრისგან მოტანილიქვა-ღორღის გამო ავტომანქანები ვერ მოძრაობენ.

”ებრაელების სასაფლაოდან ჩამოტანილმა თიხამ გზა ჩაკეტა. მთელი ტალახი ჩემი სახლის წინ მოგროვდა და მანქანით ვეღარ შემოვსულვარ. რამდენი წელია ასფალტის დაგებას ვითხოვთ, მაგრამ ყურადღებას არავინ გვაქცევს. სამი ეკლესიაა ჩვენს ქუჩაზე. ხალხი არ ვართ? რატომ არავინ ინტერესდება ჩვენი ბედით?” - კითხულობს გურამიშვილის ქუჩის მცხოვრები სამველ პოღოსიანი.



წვიმის შედეგად დაზარალდა თამარაშვილის ქუჩაზე მცხოვრები მოსახლოებაც. წყალი ადგილობრივებს სარდაფებში და სადარბაზოებში შეუვარდათ. ნიაღვარი შევარდა ამავე ქუჩაზე მაღაზიაშიც.

”მაღაზიაში ყველაფერი დასველდა, მაგრამ პარკებში იყო და გაფუჭებას გადაურჩა, ახლა ვწმენდთ. ყოველ წელს ასეთი მდგომარეობაა. მილი, სადაც წვიმის დროს წყალი უნდა გავიდეს, პატარაა, ვერ ასწრებს გადინებას და შევჩენკოს ქუჩიდან წამოსული წყალი ქუჩაში გადმოდის”, - ამბობს ”ნინო” მარკეტის მეპატრონე რამაზ აფრიამაშვილი.



[თინათინ ზაზაძე, ახალციხე]