საკირეს ტყეში ხანძრის ლოკალიზება ვერ ხერხდება

სოფელ საკირეში, დღეს, პირველ მაისს, დილიდან, სამაშველო ოპერაციებში თბილისიდან ჩამოსული 60–მდე მეხანძრე ჩერთო. თუმცა, ამ დრომდე ხანძარს მხოლოდ ცოცხალი ძალით ებრძვიან, რადგან სახანძრო მანქანები ცეცხლის კერამდე ვერ მიდიან.

„ტრაქტორი მუშაობს უკვე იმისთვის, რომ იმ ადგილამდე, სადაც ხანძარია, მანქანებმა მიახლოება შეძლონ“, – აცხადებენ საგანგებო სიტუაციების მართვის სამსახურში.

უწყების ინფორმაციით ცეცხლი სწრაფად არ ვრცელდება: „ის ტერიტორია კლდოვანია, ამიტომ ხანძარის სოფლამდე მიახლოების საშიშროება არ არსებობს. ამ ეტაპზე სამაშველო ოპერაციებში ვერც ვერტმფრენის ჩართვის საჭიროებას ხედავენ“.

შეკითხვაზე, თუ რა ფართობზეა ცეცვლი გავრცელებული ამ დროისთვის, საგანგებო სიტუაციების მართვის სააგენტოში ვერ გვპასუხობენ.

შეგახსენებთ, რომ ბორჯომში, სოფელ საკირეში ხანძრი, გუშინ, 30 აპრილს, დაახლოებით, 19:00 საათისთვის გაჩნდა. ცეცხლი წიწვოვან ტყეს უკიდია. ხანძარი სოფლიდან, დაახლოებით, შვიდი კილომეტრის მოშორებითაა.

[მარიამ ბარძიმაძე, ბორჯომი]