საგანგებო: ‘საკირეს ტყეში ცოცხალი ძალა მთელი ღამე იმუშავებს’

ფოტო არქივიდან

საგანგებო სიტუაციების მართვის სამსახურში აცხადებენ, რომ სახანძო სამაშველო სამსახური რეგიონის მასშტაბითაა მობილიზებული, თუმცა, ადგილამდე მანქანები მისვლას ვერ ახერხებენ.

„მეხანძრეები გადასატანი წყლის ბალონებით ცდილობენ ცეცხლის ჩაქრობას. ცოცხალი ძალა მთელი ღამე იმუშავებს. ცეცხლი უკიდია ხმელ ხეებს და ბალახს“, – ამბობს საგანგებო სიტუაციების მართვის სააგენტოს საზოგადოებასთან ურთიერთობის სამსახურის წარმომადგენელი მიშა ფეიქრიშვილი.

შეკითხვაზე, რადგან ადგილი მიუვალია, არის თუ არა იმის საჭიროება, რომ დილიდან სამაშველო ოპერაციებში ვერტმფრენი ჩაერთოს, ფეიქრიშვილი გვპასუხობს: „ამაზე ვერაფერს გეტყვით, ამაზე ჯერ საუბარი არ არის“.

სამცხე–ჯავახეთის გუბერნატორის კახა სამხარაძისა და ბორჯომის მერის ლევან ლიპარტიას თქმით, დამატებითი ძალების მობილიზების საჭიროება ღამით არ არის, რადგან ცეცხლის ღია კერა თითქმის აღარც ჩანს, ამიტომ იმედოვნებენ, რომ ის ძალა, რომელიც უკვე ბორჯომში მობილიზებულია, საკმარისია.

„ადგილზეა ყველა შასაბამისი სამსახური, ამ ეტაპზე იმის საჭიროება, რომ დილიდან ვერტმფრენი ჩაერთოს ოპერაციებში არ არის, თუმცა, თუ რაიმე გართულდა, შესაბამისად იმოქმედებენ“, – ამბობს კახა სამხარაძე.

ლიპარტიას თქმით, ცეცხლი წიწვოვან ტყეს უკიდია, თუმცა ადგილი სადაც ხანძარია სველია, ამიტომ იმედოვნებს, რომ ხანძარი ნაკლებად გავრცელდებაა: „სახანძრო მანქანა ხანძრის კერასთან, დაახლოებით, 300 მეტრში მიდის. 10 მეასედზეა ცეცხლი დაახლოებით“.

ხანძარი სოფელ საკირეში, დღეს, 30 აპრილს, დაახლოებით, 19:00 საათზე გაჩნდა. ცეცხლი სოფლიდან შვიდი კილომეტრის მოშორებითაა.

[sknews.ge]