NDI: 49% ხელისუფლების საქმიანობას უარყოფითად აფასებს

ეროვნული დონის ინსტიტუტებს შორის ყველაზე კარგად იუსტიციის სახლებს, ჯარსა და ეკლესიას აფასებენ, თუმცა 2015 წლის შემდეგ ეკლესიის შეფასება თითქმის 80%-დან 56%-მდეა დაცემული.

მოქალაქეები ყველაზე ცუდად სასამართლოებს (30%-იანი ნეგატიური შეფასება და 14%–იანი დადებითი შეფასება) და პარლამენტს (35%–იანი ნეგატიური შეფასება; 2014-ში ეს მაჩვენებელი 10% იყო) აფასებენ.

ასევე დაბალია პოლიტიკური პარტიების მხარდაჭერა: 26% მასთან ყველაზე ახლოს მდგომ პარტიად "ქართულ ოცნებას" ასახელებს, 9%-"ნაციონალურ მოძრაობას", 4% კი - "ევროპულ საქართველოს".

გამოკითხვის ფარგლებში, მოქალაქეებმა ოფიციალური პირებისა და სხვა პოლიტიკური ლიდერების საქმიანობაც შეაფასეს. ქვეყნის მასშტაბით, ყველაზე კარგად პრემიერ-მინისტრ გიორგი კვირიკაშვილის, პრეზიდენტ გიორგი მარგველაშვილისა და საპარლამენტო უმცირესობის ლიდერის დავით ბაქრაძის საქმიანობას აფასებენ. თბილისელების 53%-მა დედაქალაქის მერის კახა კალაძის საქმიანობა დადებითად შეაფასა. რაც შეეხება სხვა პოლიტიკოსებს, მოსახლეობის 46%–ს პოზიტიური დამოკიდებულება აქვს დავით სერგეენკოსადმი, 34%–ს - დავით ბაქრაძისადმი, 31%–ს კი - თეა წულუკიანისადმი;

ამ სამს მთლიანობაში ყველაზე პოზიტიურად აფასებენ.

აღნიშნული გამოკითხვა 2018 წლის 20 მარტი-4 აპრილის პერიოდში, საქართველოს მასშტაბით 2,194 პირისპირ ინტერვიუს წარმომადგენლობითი შერჩევის საფუძველზე, ქვეყნის ქართულ, სომხურ და აზერბაიჯანულენოვან მოსახლეობას შორის ჩატარდა (ოკუპირებული ტერიტორიების გამოკლებით).

კვლევაში საშუალო ცდომილების ზღვარი არის +/- 2,2 პროცენტი.

[sknews.ge]