სამცხე–ჯავახეთს ამერიკის ელჩის მოვალეობის შემსრულებელი სტუმრობდა

რუდის ვიზიტი 19 აპრილს, ჯავახეთიდან დაიწყო. ელჩის მოვალეობის შემსრულებელმა ახალქალაქში სოფელ კარტიკამში ახალგარემონტებული სკოლა გახსნა. ასევე, ადგილობრივ მეწარმეებსა და ჟურნალისტებს შეხვდა.

ელიზაბეთ რუდმა ასპინძაში, მესხური ტერასებიც მოინახულა. 20 აპრილს შეხვედრები ახალციხეში გაიმართა. ელჩის მოვალეობის შემსრულებელი ახალციხეში ადგილობრივი ხელისუფლების წევრებს შეხვდა, ასევე, დაათვალიერა ახალციხის ამერიკის კუთხე და უპასუხა მოსწავლეების შეკითხვებს.

„სასიამოვნო შეხვედრა იყო, მოსწავლეები არიან ძალიან კარგები და მოტივირებულები. ბავშვებს აინტერესებდათ რა განსხვავება ქართულ და ამერიკულ განათლებას შორის, რას ნიშნავს იყო დიპლომატი. ასევე მკითხეს საქართველოს განვითარების პერსპექტივებზც“, – განაცხადა შეხვედრის დასრულების შემდეგ ელიზაბეთ რუდმა.

ადგილობრივი ხელისუფლების წარმომადგენლებთან შეხვედრა მედიისთვის დახურული იყო.

„ვისაუბრეთ რა გამოწვევებს ხედავენ ისინი ამ რეგიონში, რამდენად დაიძლია ეს გამოწვევები ამერიკული პროგრამებით და რა უნდა გავაკეთოთ მომავალში, როგორი პროგრამები უნდა შევიმუშაოთ. ვისაუბრეთ ადგილობრივი და ცენტრალური ხელისუფლების ურთიერთდამოკიდებულებაზეც“, – განაცხადა ელჩის მოვალეობის შემსრულებელმა შეხვედრის შემდეგ.



[თინათინ ზაზაძე, ახალციხე]