სამცხე–ჯავახეთის გუბერნატორი: 'მთავარი გამოწვევა ხალხის დასაქმებაა'

სამცხე–ჯავახეთის გუბერნატორი კახა სამხარაძე ფიქრობს, რომ რეგიონი ერთდროულად ტურიზმისა და სოფლის მეურნეობის მიმართულებით უნდა განვითარდეს. მისი თქმით, ორივე დარგი, ერთმანეთთან მჭიდრო კავშირშია და ერთის განვითარება ავტომატურად, მეორის წინსვლას გულისხმობს.

"რეგიონი კულტურული და ისტორიული თვალსაზრისით უნიკალურია, ამიტომ მნიშვნელოვანია ტურისტული ინფრასტრუქტურის განვითარება. ბევრი ტურისტი თუ შემოვა, ადგილობრივი გასაღების ბაზარი აქ მცხოვრებლებისთვის მთავარი საყრდენი იქნება, ეს კი სოფლის მეურნეობის განვითარებას შეუწყობს ხელს", – ამბობს სამხარაძე.

მისივე განმარტებით, მისთვის მთავარი გამოწვევა რეგიონში ხალხის დასაქმება, ასევე ზოგადი სოციალური ფონის გაუმჯობესებაა. შეკითხვაზე, თუ როგორ აპირებს ამ პრობლემების გადაჭრას, გვპასუხობს: "ერთდროულად ბევრი გზა არსებობს ამისთვის. კერძო სექტორის განვითარებაა მნიშვნელოვანი, რომ მოხდეს ადგილობრივი მოსახლეობის დასაქმება".

მისი თქმით, რეგიონის ტურისტულ პოტენციალს ამ თვალსაზრისითაც დიდი მნიშვნელობა აქვს: "აბასთუმანში განვითარების გეგმა და პროექტები უკვე გვაქვს, ასევე ადიგენში კეთდება გზა, რომელიც სამცხე–ჯავახეთს და აჭარას დააკავშირებს. ეს ყველაფერი აუცილებლად განავითარებს კერძო სექტორს და ხალხი დასაქმდება".

შეკითხვაზე, თუ რა მიმართულებით შეიძლება რეგიონში ინვესტიციების მოზიდვა, მეტი სამუშაო ადგილის შექმნის მიზნით, სამხარაძე გვპასუხობს: "ასე უცებ ამისი თქმა რთულია. მე დამხვდა რეგიონის 2018–2021 წლების განვითარების სტრატეგია. დიდი დოკუმენტია და ბოლომდე გაცნობა ვერ მოვასწარი, თუმცა უკვე მაქვს ჩემი ხედვები, რისი დამატებაც, ვფიქრობ, რომ შესაძლებელი იქნება, მაგრამ ჯერ ყველა მუნიციპალიტეტს მინდა გავეცნო კარგად და ამის შემდეგ მივაწოდო სახელმწიფოს რეგიონის განვითარების ჩემეული პოზიცია".

გუბერნატორი რეგიონში მიმდინარე ინფრასტრუქტურულ პროექტებს უკვე გაეცნო. მისი თქმით, ყველა პროექტი, რომელზეც ტენდერი გამოცხადდა უკვე დაკორექტირებულია: "ყველა პროექტი რის საფუძველზეც ტენდერი გამოცხადდა სრულყოფილია, გასულ წლებში ტენდერში გამოვლენილ კომპანიებს ხშირად პროექტების დაკორექტირება სჭრიდებოდათ, რასაც სამუშაოების ვადების გადაწევა მოყვებოდა. ამ რეგიონში კიდევ მკაცრი კლიმატური პირობების გამო, მუშაობისთვის ძალიან ცოტა დროა. ამიტომ სრულყოფილი და დაკორექტირებული პროექტების ტენდერზე გატანა ძალიან მნიშვნელოვანია".

[თამუნა უჩიძე, ახალციხე]