საავადმყოფოში შეყვანილ თურქეთის მოქალაქეებს ინტოქსიკაცია დაუდგინდათ

ახალციხის რეფერალურ ჰოსპიტალსა და კლინიკა „იმედში“ შეყვანილ პაციენტებს დღის ბოლომდე გაწერენ.

"გონზე ორივე გუშინ, გვიან ღამით მოვიდა. ლაბორატორიული ანალიზის შედეგად ინტოქსიკაცია დაუდგინდათ. რა გახდა მოწამვლის მიზეზი, ამის თქმის უფლება არ გვაქვს“, – აცხადებენ კლინიკა „იმედში“, სადაც თურქეთის ორი მოქალაქე იმყოფება.

ასევე, ინტოქსიკაცია დაუდგინდა ახალციხის რეფერალურ ჰოსპიტალში შეყვანილ ერთ პაციენტსაც. თუმცა, ინტოქსიკაციის გამომწვევ მიზეზებზე არც აქ საუბრობენ: „თავს უკვე კარგად გრძნობს, გვიან ღამითვე გამოკეთდა“.

სურსათის ეროვნულ სააგენტოში აცხადებენ, რომ სურსათით მოწამვლასთან დაკავშირებით მათთან ამ დრომდე შეტყობინება არ შესულა: "საკვებით რომ მოწამლულიყვნენ საავადმყოფო, ან შინაგან საქმეთა სამინისტრო შეგვატყობინებდა, თუმცა, მხოლოდ მას შემდეგ მოგვმართავდნენ, რაც ეს ფაქტი დადასტურდებოდა, ანუ ჯერ ის უნდა დადგინდეს, რომ პირი ნამდვილად სურსათით მოიწამლა და ამის შემდეგ მოგვამართავენ".

შეგახსენებთ, რომ თურქეთის სამი მოქალაქე უგონო მდგომარეობაში, ახალციხის ერთ–ერთ საოჯახო სასტუმროს ნომერში დიასახლისმა, ხუთ აპრილს, დაახლოებით 19:00 საათისათვის ნახა. სამივე მათგანი სასწრაფო სამედიცინო დახმარების ჯგუფმა საავადმყოფოში გადაიყვანა. მომხდარს სწავლობს შინაგან საქმეთა სამინისტრო.

[ლუბა გიორგაძე, ახალციხე]