თურქეთის სამი მოქალაქე საავადმყოფოში უგონო მდგომარეობაში შეიყვანეს

ახალციხეში, რაბათის დასახლებაში მდებარე ერთ–ერთ საოჯახო სასტუმროში, გუშინ, ოთხ აპრილს, გვიან ღამით შესული თურქეთის სამი მოქალაქე, დიასახლისმა ნომერში უგონო მდგომარეობაში ნახა.

„დაახლოებით 35–დან 40 წალმდე ასაკის კაცები არიან. გუშინ მოიყვანა ჩემმა შვილმა ღამე, მეგობარს უთხოვია, სასტუმროში წაიყვანეო. მთელი დღე გარეთ რომ არ გამოჩნდნენ, გადავწყვიტეთ კარები ჩვენ გაგვეღო და ვნახეთ, რომ არცერთი მათგანი გონზე არ იყო. მერე სასწრაფო გამოვიძახეთ“, – გვიყვება დიასახლისი და ამატებს, რომ რა შეიძლება გამხდარიყო მათი ცუდად გახდომის მიზეზი არ იცის – „ჩვენთან არაფერი უჭამიათ და დაულევიათ. ისიც არ ვიცი ალკოჰოლის ზემოქმედების ქვეშ იყვნენ თუ არა“.

სამივე მათგანი სასწრაფო სამედიცინო დახმარების ჯგუფმა, დაახლოებით, 19:00 საათზე საავადმყოფოებში გადაიყვანა. მათ შორის ორი კლინიკა „იმედში“ ერთი კი ახალციხის რეფერალურ ჰოსპიტალში შეიყვანა.

კლინიკა „იმედში“ აცხადებენ, რომ ამ დრომდე არცერთი მათგანი გონზე არ მოსულა: „ლაბორატორიული კვლევები უტარდებათ და ექიმების დაკვირვების ქვეშ იმყოფებიან“.

რაც შეეხება რეფერალურ ჰოსპიტალში შეყვანილს, როგორც სამედიცინო დაწესებულებაშ ამბობენ, პაცინეტი უკვე კონტაქტურია: „მისი მდგომარეობა სტაბილურია, ლაბორატორიულ გამოკვლევებს ვუტარებთ“.

შეკითხვაზე, რა შეიძლება გამხდარიყო მამაკაცების ცუდად გახდომის მიზეზი ექიმები აცხადებენ, რომ ვიდრე ლაბორატორიული გამოვკელვების პასუხები არ ექნებათ, ვერაფერს იტყვიან.

მომხდარს იკვლევს შინაგან საქმეთა სამინისტროც.

[ლუბა გიორგაძე, ახალციხე]