'ოცნება' ახალციხეში პარტიული შტაბების გახსნას გეგმავს [Video]

მესხეთის თეატრში „ქართული ოცნების“ რეგიონული კონფერენცია, დაახლოებით, ერთ საათს გაგრძელდა.

ახალციხე პარტიის ლიდერებმა ისე დატოვეს, რომ კომენტარი არც შეხვედრის დაწყებამდე და არც დასრულების შემდეგ არ გაუკეთებიათ.

ახალციხის მუნიციპალიტეტის საკრებულოში ფრაქცია „ქართული ოცნების“ თავმჯდომარის გიორგი გვარამაძის თქმით, დღევანდელ სხდომაზე პრემიერ მინისტრმა რეგიონში განხორციელებული ინფრასტრუქტურული პროექტების შესახებ ისაუბრა, შემდეგ კი ახალციხის საოლქო ორგანიზაციის ხელმძღვანელისა და ბიუროს წევრების არჩევა მოხდა.

სხდომაზე დამსწრე 250–მა დელეგატმა, ახალციხის საოლქო ორგანიზაციის თავმჯდომარედ გიორგი კოპაძე, ბიუროს წევრებად კი მაია წითლანაძე, ზურაბ სამსონიძე, მურმან თოთაძე, ბიჭოკო მოდებაძე და საბა ჩინჩალძე აირჩია.

გიორგი კოპაძე აცხადებს, რომ მისი სამომავლო მიზანი ახალციხის საოლქო ორგანიზაციის გაძლიერებაა: „ეს ორგანიზაცია თავის დროზე მე შევქმენი თანამებრძოლებთან ერთად. მაშინ 75 კაცი იყო, დღეს კი 1 000–ზე მეტი წევრი გვყავს. ახლა გვინდა, რომ მათ უკეთესი მატერიალურ–ტექნიკური ბაზა შევუქმნათ, იმისთვის, რომ მეტი შტაბები გაიხსნას“.

შეგახსენებთ, რომ ახალციხეში „ქართული ოცნების“ რეგიონული კონფერენცია პრემიერ მინისტრმა გიორგი კვირიკაშვილმა გამართა. შეხვედრა ჟურნალისტებისთვის დახურული იყო.









[ლუბა გიორგაძე, ახალციხე]