უვიზო რეჟიმის წესების დარღვევა, თავშესაფრის მოთხოვნა – დისკუსია ახალციხეში

შეხვედრებზე დამსწრეებს განუმარტეს რას ნიშნავს უვიზო რეჟიმი, რომელ ქვეყანაში შეიძლება მოგზაურობა ვიზის გარეშე.

დისკუსია ნატოსა და ევროკავშირის შესახებ საინფორმაციო ცენტრის წარმომადგენლებმა გამართეს. როგორც მათ განაცხადეს, გასულ, 2017 წელს, უვიზო რეჟიმით 240 000–მა ადამიანმა ისარგებლა. ეს ის მოქალქეები არიან, რომლებიც წავიდნენ და უკანვე დაბრუნდნენ.

მათივე განმარტებით, არის შემთხვევები, როცა საქართველოს მოქალაქეები სხვა ქვეყანაში ლტოლვილის სტატუსით ჩაბარებას ითხოვენ. ასეთი მოთხოვნების 97% არ კმაყოფილდება. მაგალითად, 2017 წელს, გერმანიაში ლტოლვილის სტატუსის მოთხოვნის მხოლოდ 2 % დაკმაყოფილდა, შვედეთში 0%. მთლიანად ევროკავშირის მასშტაბით კი მხოლოდ 3% კმაყოფილდება.

საუბარი შეეხო იმ რისკებსაც, რაც ქვეყანას ექმნება იმ შემთხვევაში, თუ მოქალაქეები ხშირად დაარღვევენ უვიზო მიმოსვლის წესებს, ან არამართლზომიერად გამოიყენებენ ევროკავშირის ქვეყნებში თავშესაფრის მიღების პროცედურებს.

უვიზო მიმოსვლის წესების დარღვევად ჩაითველაბ შემდეგი პირობები: თუ გაიზრდება თავშესაფრის მაძიებელთა რაოდენობა, თუ ქვეყანა არ შეასრულებს და წასულ მოქალაქეებს, რომლებიც არალეგალურად იმყოფებიან სხვა ქვეყანაში, არ დააბრუნებს უკან, ასევე, თუ ჩვენს მოქალაქეებს კონკრეტულ ქვეყანაში შეექმნებათ საფრთხე.

შეხვედრა მასშტაბური საინფორმაციო კამპანიის ფარგლებში გაიმართა. ამ კამპანიის ფარგლებში 50–მდე მსგავსი შეხვედრა შედგა.
საინფორმაციო კამპანია საგარეო საქმეთა სამინისტროსა და ნატოსა და ევროკავშირის შესახებ საინფორმაციო ცენტრის ორგანიზებით, სამოქალაქო სექტორთან თანამშრომლობით, საქართველოში ევროკავშირის დელეგაციისა და მიგრაციის პოლიტიკის განვითარების საერთაშორისო ცენტრის (ICMPD) მხარდაჭერით ხორციელდება.



[მარიამ ბარძიმაძე, ახალციხე]