დედასა და მეზობლებზე ძალადობაში ბრალდებულს ბრალი დაუმძიმეს

ახალგაზრდა მამაკაცს ბრალი ორი მუხლით ედება. მას პროკურატურა ოჯახში არასრულწლოვნების თანდასწრებით ძალადობასა და ასევე, ორი, ან მეტი პირის მიმართ ძალადობაში ადანაშაულებს. აღნიშნული მუხლები ჯარიმას, ან თავისუფლების აღკვეთას ერთიდან სამ წლამდე ითვალისიწნებს.

ახალციხის რაიონულმა სასამართლომ დაკავებული გ.ბ–ს აღკვეთის ღონისძიების შეფარდებაზე დღეს, 30 მარტს იმსჯელა. მოსამართლე ნათია მერაბიშვილმა პროკურორის შუამდგომლობა დააკმაყოფილა და ბრლადებულს აღკვეთის ღონისძიებად პატიმრობა შეუფარდა.

ბრალდებულს ადვოკატი არ ჰყავდა. სხდომას არც მისი ახლობლები დასწრებიან.

„ვერ მივუსწარით პროცესს. სოციალურად დაუცველები ვართ და მოვითხოვთ ამის მერე ადვოკატის დანიშვნას“, – ამბობს დაკავებულის დედა ზ.ბ.

შეგახსენებთ, რომ ახალციხის რაიონული სამმართველოს თანამშრომლებმა გ.ბ. საკუთარ სახლში, 27 მარტს, ღამით დააკავეს. ადგილობრივების თქმით, მან დედას ყელში ხელი წაუჭირა, მეზობლებს კი ქვები დაუშინა. გ.ბ–ს ბრალი ჯერ მხოლოდ ძალადობის მუხლით ედებოდა. საბოლოოდ იგი პროკურატურამ პასუხისგებაში ძალადობის და ასევე ოჯახში ძალადობის მუხლებით მისცა.

[თამუნა უჩიძე, ახალციხე]