მედლების საქმე შესაძლოა სასამართლომდე მივიდეს

სკოლის დირექტორი გია კაპანაძე ამბობს, რომ სამინისტროსთვის გასაგზავნი განცხადება მზად აქვს და სავარაუდოდ ხვალ გააგზავნის: „წერილში ყველა დარღვევაზე ვწერთ, რაც იყო ჟურნალის წარმოებასთან დაკავშირებით და ვიხოვთ ბავშვებისთვის მედლების მიცემას. იმსჯელებენ და გაგვცემენ პასუხს“.

ამ წერილის გაგზავნასა და მის პასუხს ელოდება სკოლის ერთ–ერთი კურსდამთავრებულის მშობელი თეა გავაშელი: „ვითხოვ ამიხსნან თუ ეკუთვნის, რატომ არ აძლევენ მედალს ჩემ შვილს; თუ არ ეკუთვნის, არგუმენტირებულად განმიმარტონ, რატომ არ ეკუთვნის. როცა ვურეკავ, დირექტორი მეუბნება დღეს გავაგზავნი, ხვალ გავაგზავნიო. თუ დროულად არ მიმართავს სამინისტროს, სარჩელს სასამართლოში შევიტან“.

შეგახსენებთ, რომ საქმე ეხება სკოლის ვერცხლისა და ოქროს მედლებზე წარდგენილ მოსწავლეებს. საკლასო ჟურნალებში გადასწორებული ნიშნების გამო ექვსი მოსწავლიდან ხუთმა მედალი ვერ მიიღო. სკოლის ადმინიტრაციის განმარტებით, პედაგოგებმა განაცხადეს, რომ შეცდომა მოუვიდათ და მოსწავლის ბრალეულობა არ იკვეთება, თუმცა, სამინისტრომსპეციალურმა კომისიამ სკოლას მედლების გაცემის რეკომენდაცია არ მისცა.

მეექვსე საჯარო სკოლის გარდა, მსგავსი პრობლემაა ახალციხის მუნიციპალიტეტის კიდევ რამდენიმე სკოლაში. სამინისტროს კომისიამ ოქროს და ვერცხლის მედალზე არ წარდგენის რეკომენდაცია გასცა აწყურის, წყრუთის და ვალის პირველი სკოლის თითო მოსწავლეზე და ასევე, ვალის მეორე სკოლის ოთხ მოსწავლეზე. მსგავსი პრობლემაა ახალციხის პირველ საჯარო სკოლაშიც.

[ლუბა გიორგაძე, ახალციხე]