ვალეში კათოლიკური რელიკვიების დაწვის საქმეზე ათობით მოწმე დაკითხეს

სამცხე–ჯავახეთის ოლქის პროკურატურაში გამოძიების დეტალებზე არ საუბრობენ.

„დაკითხულია ათეულობით მოწმე, დანიშნულია ექსპერტიზები. გვინდა, რომ ეფექტურად მივიდეთ ბოლომდე, მაგრამ სამწუხარო რეალობაა, რომ ამ ქმედებას თვითმხილეველი არ ჰყავს. ეს კი მხოლოდ ჩვენი, გამოძიების პრობლემა“, – ამბობს ოლქის პროკურორი შოთა რიჟამაძე.

საქართველოს სახალხო დამცველმა საგამოძიებო უწყებას მოუწოდა რეგულარულად აწარმოოს საზოგადოების ინფორმირება გამოძიების მიმდინარეობის შესახებ. ოლქის პროკურორი აცხადებს, რომ როგორც კი საქმეს ბრალდებული ან დაზარალებული ეყოლება, ინფორმაციას აუცილებლად გაავრცელებს: „მაქსიმალურად გახსნილები ვქნებით კანონის ფარგლებში. მოთხოვნის შემთხვევაში მზად ვართ ომბუდსმენის აპარატთან თანამშრომლობისთვისაც“.

ვალეში, წმინდა ნინოს სამლოცველოს გვერდით, სადაც კათოლიკე მრევლიც ლოცულობს და მართლმადიდებელიც, რელიგიური რელიკვიები 12 მარტს დაწვეს. მომხდარს რელიგიურ საქმიანობაში ხელის შეშლის მუხლით იძიებს.

[თამუნა უჩიძე, ახალციხე]