აშშ-ს საელჩოს 2014 წლის საგრანტო კონკურსი

ადგილობრივი არასამთავრობო ორგანიზაციებისა და მედიის წარმომადგენლებს ყოველწლიურ საგრანტო კონკურსში მონაწილეობის პირობები დემოკრატიის კომისიის მცირე გრანტების პროგრამის კოორდინატორებმა სოფიო გეგეჭკორმა და ნინო გაგუამ გააცნეს.

მათი განმარტებით, 2014 წელს, აშშ-ს საელჩო შემდეგი ოთხი მიმართულების პროექტებს დააფინანსებს: სამოქალაქო ჩართულობა, ახალგაზრდების ჩართულობა, გარემოს დაცვა და მასმედიის განვითარება.

როგორც საგრანტო პროგრამების კოორდინატორი სოფიო გეგეჭკორი ამბობს, თითოეული პროექტისთვის მაქსიმალური თანხა 24,000 დოლარია განსაზღვრული. განაცხადის წარდგენის ბოლო ვადა 2014 წლის 28 თებერვალია.

„პროექტების განხილვა შემოტანიდან 3-6 თვემდე გრძელდება. კომისიის განხილვის შემდეგ სახელმწიფო დეპარტამენტი ვაშინგტონში იღებს დაფინანსების საბოლოო გადაწყვეტილებას“, - ამბობს სოფიო გეგეჭკორი.

კონკურსისთვის საქართველოს მასშტაბით გამოყოფილია 450 ათასი დოლარი და ამ თანხით სავარაუდოდ 25 პროექტი დაფინანსდება. პროექტის ხანგრძლივობა სამი თვიდან ერთ წლამდეა.

განმცხადებლებმა მომზადებული პროექტი 28 თებერვლის 18:00 საათამდე უნდა გააგზავნონ ფოსტით ან ჩააბარონ ამერიკის საელჩოს მისაღებში, მისამართზე: თბილისი, აშშ-ს საელჩო, საზოგადოებასთან ურთიერთობის განყოფილება, ჯორჯ ბალანჩინის ქ. N11.

კონკურსში მონაწილეობის მსურველებს ინგლისურ-ქართული და ინგლისურ-რუსული განაცხადის ფორმების ჩამოტვირთვა შეუძლიათ საელჩოს ვებგვერდიდან: http://georgia.usembassy.gov/resources/demcom.html.

კონკურსის პრეზენტაციები უკვე გაიმართა დასავლეთ საქართველოში, გორსა და ხაშურში.

[მანანა სარაშვილი, ახალციხე]