ანსამბლ ‘მესხეთის’ მოცეკვავეებს მეცადინეობისთვის გამოცვლა ეზოში უხდებათ

სამთვიანი ლოდინის შემდეგ, ქორეოგრაფიულმა ანსამბლმა „მესხეთმა“ პირველი საჯარო სკოლის სპორტდარბაზიდან საკონფერენციო დარბაზში გადაინაცვლა. თუმცა, მას შემდეგ რაც „მესხეთს“ დარბაზი იჯარით გადაეცა, სკოლის დირექტორმა ჟუჟუნა გოგოლაურმა მთავარი შესასვლელი კარი დაკეტა. მოცეკვავეები დარბაზში პირდაპირ, დერეფნის გავლის გარეშე, შენობის უკანა მხრიდან შედიან.

ოთახი, სადაც ცეკვის გაკვეთილები ტარდება საკონფერენციო დარბაზისთვისაა მოწყობილი და ამიტომ გასახდელი არ აქვს. ბავშვები თუ აქამდე სპორტდარბაზის გასახდელში იცვლიდნენ, ახლა ამის უფლება აღარ აქვთ. ამიტომ მათ გამოცვლა ეზოში, ან დარბაზშივე უხდებათ. მშობლებიც ბავშვებს გარეთ უცდიან.

„რამდენიმე დღეა რაც სპორტდარბაზიდან აქ გადმოვედით და ძალიან ვწვალობთ. ჯერ კიდევ ძალიან ცივა და ბავშვებს გარეთ ვხდით, მერე მათი ტანსაცმლით ხელში ეზოში ვიცდით გაკვეთილის დასრულებამდე. თუ საშუალებაა, დარბაზში შეგვყავს პატარები და იქვე ვუცვლით და ტანსაცმელსაც სკამებზე ვაწყობთ“, – ამბობს ერთ–ერთი მშობელი,რომელსაც ვინაობის გამხელა არ სურს.



პირველ საჯარო სკოლაში გასახდელი სპორტულ დარბაზთანაა, თუმცა როგორც ანსამბლის ხელძღვანელი ლევან ქიმერიძე გვიხსნის, დირექტორი მისი გამოყენების უფლებას მოცეკვავეებს არ აძლევს: „დირექტორმა გვითხრა, რომ იმ გასახდელში დამლაგებლების ოთახის, ან „ბუფეტის“ მოწყობას აპირებს. ამიტომ ჯერ–ჯერობით სხვა გზა არ გვაქვს, ვიდრე რაიმე ოთახს მოგვაქირავებს იმისთვის რომ ბავშვებმა გამოიცვალონ, ასე წვალება მოგვიწევს“.

ჟუჟუნა გოგოლაური აცხადებს, რომ სკოლას გასახდელი სჭირდება, თუმცა დროებით მისი გაუქმება მოუწევს. მიზეზი ისაა, რომ სკოლაში გამოცდების ეროვნული ცენტრი შედის და მას შესაბამისი სივრცე სჭრიდება: „დამლაგებლების ოთახი გამოცდების ეროვნულ ცენტრს დასჭირდება. გარდა ამისა, გამოცდების პერიოდში სკოლაში „ბუფეტი“ აუცილებლად უნდა გვქონდეს. ამიტომ გასახდელში დროებით ან „ბუფეტს“ და ან დამლაგებლების ოთახს მოვაწყობთ. სკოლაში სხვა ფართი რომ მქონდეს, ბუღალტერი საკუთარ კაბინეტში არ მეყოლებოდა“.

რაც შეეხება სკოლის ცენტრალური შესასვლელი კარის დაკეტვას გოგოლაური ამბობს, რომ ეს საიჯარო ხელშეკრულებითაა გათვალისწინებული, რომელზეც ჯერ მხარეებს ხელი არ მოუწერიათ: „ჯერ ხელშეკრულება არ დადებულა, თუმცა იქ წერია, რომ მეცადინეობებისას მოსწავლეები, სკოლის უკანა კარიდან შევლენ, რომელიც პირდაპირ საცეკვაო დარბაზს უკავშირდება“.

ქიმერიძის თქმით, მას ჯერ არ აქვს გადაწყვეტილი თუ როგორ შეიძლება ამ პრობლემის გადაჭრა: „თუ დირექტორი რომელიმე ოთახს გასახდელისთვის მომაქირავებს, მზად ვარ რომ დარბაზთან ერთად ქირა იმაშიც გადავიხადო“.



გარდა გასახდელისა, მოცეკვავეებს სკოლაში საპირფარეშოთი სარგებლობაზეც პრობლემა შეექმნათ. დირექტორი მოსწავლეებს ტუალეტებში შესვლას უკრძალავდა. გოგოლაური ამბობს, რომ იგი ბავშვებს საპირფარეშოთი სარგებლობის უფლებას მისცემს, თუმცა მათ მშობლებს არა.

„კონკრეტულად ბავშვებთან პრეტენზია არ მქონდა, საპირფარეშოში მშობლები შედიოდნენ და ცუდ დღეში აგდებდნენ, იმედია დღეიდან ეს პრობლემა აღარ იქნება“, – ამბობს სკოლის დირექტორი ჟუჟუნა გოგოლაური და ამატებს, რომ მან ბავშვებს ტუალეტში შესვლის ნება უკვე მისცა.

აუქციონი, რომლის მეშვეობითაც ანსამბლმა „მესხეთმა“, ახალციხის პირველ საჯარო სკოლაში საკონფერენციო დარბაზი იჯარით აიღო, ექვს მარტს დასრულდა. საიჯარო პირობების მიხედვით, ანსამბლი სკოლაში ერთი წლის განმავლობაში იცეკვებს და თვეში 300 ლარს გადიხდის, თუმცა ჯერ ხელშეკრულება ანსამბლსა და სკოლას შორის გაფორმებული არაა.

„ამას თავისი პროცედურები აქვს და დრო სჭირდება“, – ამბობს გოგოლაური.



ანსამბლი „მესხეთი“ ოთხი ათეული წელია პირველ სკოლასთან არსებობს. სკოლის შენობაში კი მისთვის დარბაზის გამოყოფის საკითხი 2016 წელს დადგა, როდესაც სკოლაში სარეაბილიტაციო სამუშაოები მიმდინარეობდა. ვიდრე რემონტი დასრულდა, „მესხეთი“ ჯერ მესამე საჯარო სკოლის სპორტდარბაზში იყო, შემდეგ თეატრის შენობაში. თუმცა, აქაც სარემონტო სამუშაოების გამო გახდა იძულებული შენობა დაეტოვებინა. ამის შემდეგ კი მეცადინეობები რესტორან „ტყუპების“ ნაქირავებ დარბაზში მიმდინარეობდა.

გასული წლის დეკემბრის შუა რიცხვებიდან, პირველის საჯარო სკოლის გახსნის შემდეგ, „მესხეთი“ პირველი სკოლის სპორტდარბაზში მეცადინეობდა.

[ლუბა გიორგაძე, ახალციხე]