პირველ სკოლაში საცეკვაო დარბაზის მოთხოვნით ხელმოწერები გროვდება

ხელმოწერების შეგროვება, გუშინ, 16 აპრილს დაიწყო.

„ისევ იმ დარბაზში გვინდა დავბრუნდეთ, სადაც სკოლაში რემონტის დაწყებამდე ვცეკვავდით“, – ამბობს ანსამბლის ხელმძღვანელი ლევან ქიმერიძე.

მისი თქმით, „მესხეთში“ მოცეკვავე 400 ბავშვიდან, 250–ზე მეტი პირველი საჯარო სკოლის მოსწავლეა. ამიტომ მათთვის ანსამბლის სკოლში დარჩენა განსაკუთრებით მნიშვნელოვანია: „ეს ბავშვები მეცადინეობაზე გაკვეთილების შემდეგ შემოდიან“.

ანსამბლში მოცეკვავე ბავშვების მშობლები აცხადებენ, რომ სკოლის ადმინისტრაციისთვის ეს საკითხი სულ ერთი არ უნდა იყოს: „აქ ჩვენი შვილებიც რომ არ ცეკვავდნენ, ამდენი წელია სკოლას ანსამბლი ჰყავს და დარბაზის გამო ახლა არ უნდა დაკარგოს“.

მათი თქმით, განსაკუთრებით მნიშვნელოვანია ის, რომ ბავშვებს სკოლისა და ცეკვის გაკვეთილები ერთ სივრცეში უტარდებათ: „პირველ და მეორე კლასელებს გაკვეთილების შემდეგ ჩვენი სკოლაში მისვლა და ცეკვაზე წაყვანა არ სჭირდებათ. იმ მშობელს, ვისაც სამსახურის, ან რაიმე სხვა მიზეზის გამო, შუადღით დრო არ აქვს, რომ ბავშვი ცეკვაზე წაიყვანოს, ალბათ დაატოვებინებს ანსამბლს“.

მშობლებისა და ლევან ქიმერიძის განცხადებით, მას შემდეგ რაც ხელმოწერები შეგროვდება, მას წარადგენენ ყველა უწყებაში, სადაც ამის საჭიროება იქნება.

შეგახსენებთ, საუბარი იმის შესახებ, რომ შესაძლოა ანსამბლმა სკოლა დატოვოს, მას შემდეგ გაჩნდა, რაც შენობაში სარემონტო სამუშაოები დაიწყო. დარბაზში, რომელშიც ამ დრომდე „მესხეთი“ ცეკვავდა, სკოლის რემონტის დასრულების შემდეგ შესაძლოა ადმინისტრაციამ საკონფერენციოდ გამოიყენოს.

სკოლის დირექცია ანსამბლს სამეცადინოდ სპორტ დარბაზსა და სასწავლებლის ფოეის სთავაზობს, თუმცა ქიმერიძე ირწმუნება, რომ არც ერთი და არც მეორე სამუშაოდ არ გამოდგება. აქ აკუსტიკა იქნება და ბავშვებს რიტმი აერევათ.
[თამუნა უჩიძე, ახალციხე]